കൊച്ചി: വിമാനയാത്രക്കാരെ വലച്ച് ടിക്കറ്റ് നിരക്കുകൾ ഉയരുകയാണ്. ഇതിന് പിന്നിൽ കാരണങ്ങൾ നിരവധിയുമാണ്. ക്രൂഡോയിൽ വില 14 വർഷത്തെ ഉയരത്തിലെത്തിയതിന്റെ ചുവടുപിടിച്ച് എണ്ണവിതരണ കമ്പനികൾ വ്യോമ ഇന്ധനം അഥവാ എ.ടി.എഫിന്റെ വിലകൂട്ടിക്കഴിഞ്ഞു.

വിമാനക്കമ്പനികളുടെ ചെലവിന്റെ 40-50 ശതമാനവും എ.ടി.എഫ് വാങ്ങാനാണ് എന്നിരിക്കേ,​ ആനുപാതികമായി അവ ടിക്കറ്റ് നിരക്കും കൂട്ടും. എന്നാൽ,​ ഇതുമാത്രമല്ല ടിക്കറ്റ് നിരക്ക് ഉയരാൻ കാരണങ്ങൾ. പരിശോധിക്കാം:

4 ഘടകങ്ങൾ

വിമാനടിക്കറ്റ് നിരക്ക് നിർണയത്തിന് നാല് ഘടകങ്ങളുണ്ട്.

1. എയർലൈൻ കമ്പോണന്റ്.

2. എയർപോർട്ട് ഓപ്പറേറ്റർ ഫീസ്.

3. എയർപോർട്ട് അതോറിറ്റി ഒഫ് ഇന്ത്യയ്ക്ക് (എ.എ.ഐ)​ നൽകേണ്ട ഫീസ്.

4. സർക്കാരിന് നൽകേണ്ട ഫീസ്.

എയർലൈൻ കമ്പോണന്റ്

അടിസ്ഥാനനിരക്ക്,​ ഇന്ധനവില,​ ടെർമിനൽ എക്വിപ്‌മെന്റ് ഫീസ്,​ ഉപഭോക്തൃസേവന നിരക്ക് എന്നിവ ഉൾപ്പെടുന്നതാണ് എയർലൈൻ കമ്പോണന്റ്.

എയർപോർട്ട് ഓപ്പറേറ്റർ ഫീസ്

വിമാനത്താവള വികസനഫീസ്,​ ഉപഭോക്തൃസൗകര്യ വികസന ഫീസ് എന്നിവ ഉൾപ്പെടുന്നതാണിത്.

എ.എ.ഐ ഫീസ്

പാസഞ്ചർ സർവീസ് ഫീസിലെ ഒരു വിഹിതമാണ് എ.എ.ഐയ്ക്ക് നൽകേണ്ടത്.

സർക്കാർ ഫീസ്

സർക്കാരിന് നൽകേണ്ട സേവനനിരക്കാണിത്.

₹83

കൊച്ചി,​ ബംഗളൂരു,​ ഡൽഹി എന്നിവിടങ്ങളിൽ നിന്ന് പറക്കുന്നവരിൽ നിന്ന് എ.എ.ഐയ്ക്കായുള്ള പാസഞ്ചർ സർവീസ് ഫീസായി ഈടാക്കുന്നത് 83 മുതൽ 236 രൂപവരെയാണ്.

₹63

ഉപഭോക്തൃസൗകര്യ വികസനഫീസ് 63 മുതൽ 142 രൂപവരെ.

₹236

യാത്രക്കാരിൽ നിന്ന് 236 രൂപ സെക്യൂരിറ്റി ഫീസായും ഈടാക്കുന്നുണ്ട്. വിമാനത്താവള സുരക്ഷാച്ചുമതലയുള്ള സി.ഐ.എസ്.എഫിനുള്ള ഫീസാണിത്.