ചെറുതോണി: കട്ടിംഗ് നാരുപാറ ശ്രീ അന്നപൂർണേശ്വരി ഭദ്രകാളി ദേവീ ഗുരുദേവ ക്ഷേത്രത്തിൽ കുംഭഭരണി മഹോത്സവത്തിന് കൊടിയേറി. ക്ഷേത്രം തന്ത്രി കെ.കെ. കുമാരൻ തന്ത്രികളുടെയും ക്ഷേത്രം ഉപദേഷ്ടാവ് ബോധി തീർത്ഥ സ്വാമികളുടെയും ക്ഷേത്രം മേൽശാന്തി കവനാപതിയിൽ വിതുൽ ശർമയുടെയും അഭിജിത്ത് ശാന്തിയുടെയും മുഖ്യകാർമ്മികത്വത്തിലാണ് ഏഴുദിവസം നീണ്ടുനിൽക്കുന്ന മഹോത്സവം നടക്കുന്നത്. തൃക്കൊടിയേറ്റിനോടനുബന്ധിച്ച് ക്ഷേത്രതിരുസന്നിധിയിൽ കെ. കെ.കുമാരൻ തന്ത്രി അനുഗ്രഹപ്രഭാഷണം നടത്തി. എസ്.എൻ.ഡി.പി യോഗം ഇടുക്കി യൂണിയൻ സെക്രട്ടറി സുരേഷ് കോട്ടയ്ക്കകത്ത് ഉത്സവ സന്ദേശം നൽകി. ഇടുക്കി യൂണിയൻ യൂത്ത് മൂവ്‌മെന്റ് പ്രസിഡന്റ് ബിനീഷ് കോട്ടൂർ ആശംസകളർപ്പിച്ചു. ശാഖാ പ്രസിഡന്റ് സുരേഷ് ചീങ്കല്ലേൽ, ക്ഷേത്രം രക്ഷാധികാരി വിശ്വനാഥൻ ചാലിൽ, വൈസ് പ്രസിഡന്റ് ഷാജി എൻ.സി. , ശാഖാ സെക്രട്ടറി മനോജ് പുള്ളോലിൽ, ക്ഷേത്രം ചെയർമാൻ ദീപക് ചാലിൽ, മാനേജ്‌മെന്റ് കമ്മറ്റി അംഗം റെജി നമ്പ്യാർമഠത്തിൽ മുതലായവർ പരിപാടികൾക്ക് നേതൃത്വം നൽകി. മഹോത്സവത്തിന്റെ നാലാം ദിവസം ഭദ്രകാളി ദേവീ പ്രതിഷ്ഠാവാർഷികമായി ആചരിക്കും. അഞ്ചാം ദിവസം ഗുരുദേവ പ്രതിഷ്ഠാവാർഷിക ദിനമായി ആചരിക്കും. നാരകക്കാനം മുതൽ എട്ടാംമയിൽ വരെയുള്ള പ്രദേശങ്ങളിൽ പറയ്‌ക്കെഴുന്നള്ളത്ത് ഉണ്ടാകും. മഹോത്സവത്തിന്റെ ഏഴാം ദിവസം വൈകിട്ട് അഞ്ചിന് കാൽവരിമൗണ്ടിൽ തയ്യാറാക്കിയ പ്രത്യേക പന്തലിൽ നിന്ന് ക്ഷേത്രത്തിലേക്ക് താലപ്പൊലി ഘോഷയാത്ര ഉണ്ടാകും.