തൊടുപുഴ: ജില്ലാ ലീഗൽ സർവീസസ് അതോറിറ്റിയുടെ നേതൃത്വത്തിൽ ജില്ലയിലാകെമാനം നടന്ന ലോക് അദാലത്തിൽ 3010 കേസുകൾ തീർപ്പാക്കി. കേരള എപ്പിഡെമിക് ഡിസീസസ് ഓർഡിനൻസ് (കെ ഇ ഡി ഒ ) പ്രകാരമുള്ള കേസുകൾ ഉൾപ്പെടെ ജില്ലയിലെ മജിസ്ട്രേറ്റ് കോടതികളിൽ കെട്ടിക്കിടന്ന 2342 പിഴ ഒടുക്കിത്തീർക്കാവുന്ന കേസുകൾ 2,53,80687 രൂപയുടെ 107 വാഹനാപകട നഷ്ടപരിഹാര കേസുകൾ, 487 ബാങ്ക് റിക്കവറി കേസുകൾ ഉൾപ്പെടെയുള്ള വിവിധ കേസുകളിലായി 10,36,82,535 രൂപയുടെ വ്യവഹാരങ്ങളാണ് തീർപ്പാക്കിയത്. 31,27,750 രൂപ പിഴയിനത്തിൽ ഗവൺമെൻ്റിലേക്ക് ഒടുക്കുകയുണ്ടായി. ജില്ലാ ജഡ്ജി ശശി കുമാർ പി സ്, ജില്ലാ ലീഗൽ സർവീസ്സസ് അതോറിറ്റി സെക്രട്ടറിയും സബ്ജഡ്ജുമായ സിറാജുദ്ദീൻ പി എ എന്നിവർ അദാലത്തിന് നേതൃത്വം നൽകി. അദാലത്തിൻ്റെ ഭാഗമായി ജില്ലയിലെ മജിസ്ട്രേറ്റ് കോടതികളിൽ പിഴയടച്ച് തീർക്കാവുന്ന കേസുകൾക്കായ് സ്പെഷ്യൽ സിറ്റിംഗും ഏർപ്പെടുത്തിയിരുന്നു.