കാസർകോട്: പന്തൽ കച്ചവടത്തിന്റെ മറവിൽ മയക്കുമരുന്ന് കടത്തും വിതരണവ നടത്തി വന്ന രണ്ടു പേർ കാസർകോട് പൊലീസിന്റെ പിടിയിലായി. പുളിക്കൂർ കോളനിക്കു സമീപം തഹലിയ ടെന്റ് ആൻഡ് ഡെക്കറേഷൻ എന്ന സ്ഥാപനം നടത്തുന്ന പുളിക്കൂർ സുമയ്യ മൻസിലിൽ അബ്ദുൽ നിയാസ് (32), ഷിറിബാഗിലു മഞ്ചത്തടുക്ക ബൈത്തുൽ വയർ മുഹമ്മദ്‌ ഇർഷാദ് (38) എന്നിവരെയാണ് കാസർകോട് ഡിവൈ.എസ്.പി പി. ബാലകൃഷ്ണൻ നായരുടെ സ്‌ക്വാഡും ടൗൺ ഇൻസ്‌പെക്ടർ പി. അജിത് കുമാറും ചേർന്ന് പിടികൂടിയത്. പ്രതികളിൽ നിന്നും 15 ഗ്രാം എം.ഡി.എം.എ, 1.300 കിലോ കഞ്ചാവ് എന്നിവ പിടികൂടി. കഞ്ചാവ് കടത്താൻ ഉപയോഗിച്ച സ്കൂട്ടറും പിടിച്ചെടുത്തു. പ്രതികളെ പിടികൂടിയ പൊലീസ് സംഘത്തിൽ ടൗൺ സ്റ്റേഷനിലെ എസ്.ഐമാരായ എം.വി വിഷ്ണു പ്രസാദ്, വേണുഗോപാൽ, രഞ്ജിത്ത് കുമാർ എന്നിവരും ഡിവൈ.എസ്.പിയുടെ സ്‌ക്വാഡിൽ പെട്ട ശിവകുമാർ ഉദിനൂർ, രാജേഷ് മണിയാട്ട്, ഓസ്റ്റിൻ തമ്പി, ഗോകുല എസ്, നിതിൻ സാരംഗ്, വിജയൻ, സുഭാഷ് ചന്ദ്രൻ എന്നിവരും ഉണ്ടായിരുന്നു.