കൽപ്പറ്റ: വനിതാദിനത്തോടനുബന്ധിച്ച് ചീങ്ങേരി മലകയറാൻ വനിതാ വ്‌ളോഗർമാരെത്തുന്നു. മാർച്ച് ആറിന് ഞായറാഴ്ച വൈകീട്ട് ജില്ലയിലെ വനിതാ മാധ്യമ പ്രവർത്തകർക്കൊപ്പം ഇന്ത്യയുടെ പല ഭാഗത്ത് നിന്നുമുള്ള ഇരുപതിലധികം യൂടൂബർമാരാണ് മല കയറുന്നത്. ചലച്ചിത്ര താരം ദേവി അജിത്തും ഇവർക്കൊപ്പം ചേരും.
സൗത്ത് വയനാട് ഡി.എഫ്.ഒ ഷജ്ന കരീമിന്റെ നേതൃത്വത്തിൽ പല മേഖലകളിൽ നിന്നുള്ള സ്ത്രീകളും പങ്കാളികളാകും.
കേരളത്തിന്റെ ടൂറിസം പ്രോത്സാഹനവും വനിതാ ശാക്തീകരണവും ഒപ്പം സമാധാനത്തിനുള്ള ഐക്യദാർഢ്യവുമാണ് പരിപാടിയുടെ ലക്ഷ്യം. വയനാട് ഡി.ടി.പി.സിയുടെയും ആൾ കേരള ടൂറിസം അസോസിയേഷന്റെയും ഗ്ലോബ് ട്രക്കേഴ്സ്, കേരള റിപ്പോർട്ടേഴ്സ് ആൻഡ് മീഡിയ
യൂണിയൻ, കേരള ഓൺലൈൻ മീഡിയ അസോസിയേഷൻ, മാധ്യമ രംഗത്തെ സ്റ്റാർട്ടപ്പായ മീഡിയവിംഗ്സ് എന്നിവയും ചേർന്നാണ് പരിപാടി സംഘടിപ്പിച്ചിട്ടുള്ളത് .

ലോക സമാധാനത്തിനാഹ്വാനം ചെയ്ത് മലമുകളിൽ 30 വെൺപതാകകൾ പറപ്പിക്കും.
രാത്രി കൊളഗപ്പാറ സൺബേർഡ് റിസോർട്ടിൽ ചേരുന്ന പൊതുസമ്മേളനത്തിൽ ജീവിത പ്രതിസന്ധികളെ അതിജീവിച്ച് ഇന്ത്യയിലെ ആദ്യത്തെ ക്രിയേറ്റീവ് അക്കൗണ്ടിംഗ് ഫിനിഷിംഗ് സ്‌കൂൾ സ്ഥാപിച്ച എറണാകുളം സ്വദേശിനി ജയശ്രീ വിജയകുമാറിന് വുമൺ എക്സലൻസ് പുരസ്‌കാരം സമ്മാനിക്കും. ജില്ലയിലെ ആദ്യത്തെ വനിതാ ടൂറിസം സംരംഭകരിൽ ഒരാളായ
ലൈസ രഘുവിനെയും ആദരിക്കും. മീനങ്ങാടി നാട്ടുകൂട്ടം കലാസമിതിയുടെ കലാവിരുന്നും ഉണ്ടാകും.

മാർച്ച് 6,7 തിയതികളിൽ വയനാട്ടിൽ നടക്കുന്ന വനിതാ ഇൻഫ്ളുവൻസേഴ്സ് മീറ്റിന്റെ ഭാഗമായാണ് പരിപാടികൾ സംഘടിപ്പിച്ചിട്ടുള്ളത്‌.