കോഴിക്കോട്: കുറ്റിച്ചിറ കുളം നവീകരണ പൈതൃക പദ്ധതിയുടെയും ഇബ്ന്‍ബത്തൂത്ത നടപ്പാതയുടെയും ഉദ്ഘാടനം ഇന്ന് വൈകിട്ട് 7.30ന് ടൂറിസം മന്ത്രി പി.എ. മുഹമ്മദ് റിയാസ് നിർവഹിക്കും. പുരാവസ്തു മന്ത്രി അഹമ്മദ് ദേവർകോവിൽ അദ്ധ്യക്ഷത വഹിക്കും. രണ്ട് കോടി രൂപ ചെലവഴിച്ച് നാല് ഘട്ടങ്ങളായാണ് പൈതൃകപദ്ധതി പൂർത്തിയാക്കിയത്. കുറ്റിച്ചിറകുളം നവീകരണ പദ്ധതിക്കായി 98,43,506 രൂപയുടെയും ഇബ്ന്‍ബത്തൂത്ത നടപ്പാതയ്ക്ക് 25,00,000 രൂപയുടെയും ഭരണാനുമതിയാണ് വിനോദസഞ്ചാരവകുപ്പ് നൽകിയിരുന്നത്. എഴുപത്തഞ്ചുലക്ഷം രൂപ എം.കെ മുനീർ എം.എൽ.എയുടെ ആസ്തി വികസന ഫണ്ടും പദ്ധതിക്കായി വിനിയോഗിച്ചു. ഇബ്ന്‍ബത്തൂത്തയുടെ സ്മരണാർത്ഥമാണ് ഇബ്ന്‍ബത്തൂത്ത നടപ്പാത നിർമ്മിച്ചിരിക്കുന്നത്. സ്വാതന്ത്ര്യ സമരസേനാനി ഹസ്സൻകോയ മുല്ലയുടെ പേരിലുള്ള കുട്ടികളുടെ പാർക്ക്, കുളകടവ് നവീകരണം, കുളം ശുചിയാക്കൽ, നടപ്പാത, ഇരിപ്പിടനവീകരണം, ക്ലാഡിംഗ് വർക്ക്, അലങ്കാരവിളക്കുകൾ, ഇലക്ട്രിക്കൽ വർക്ക് തുടങ്ങിയ പ്രവൃത്തികളാണ് പൂർത്തീകരിച്ചിട്ടുള്ളത്.