കോട്ടയം: വലിയ നോയമ്പിലും പതിവ് തെറ്റിച്ച് മൽസ്യ, മാംസ വില കുതിച്ചുയരുന്നു. 50 ദിവസം നീളുന്ന ക്രൈസ്തവരുടെ വലിയ നോയമ്പിന് മത്സ്യ മാംസങ്ങളുടെ ഉപയോഗം കുറയുമ്പോൾ വിലയും കുറയുന്നതായിരുന്നു സമീപ കാലം വരെയുള്ള പതിവ്. എന്നാൽ 100- 120 രൂപയിൽ സ്റ്റെഡിയായി നിന്ന ഇറച്ചി കോഴി വില കിലോയ്ക്ക് 160 എന്ന റെക്കാഡിലെത്തി . കേരള, സുഗുണ ഇനം ചിക്കന് വില ഇതിലും കൂടുതലാണ്. ആട്ടിറച്ചി കിലോയ്ക്ക് 750 രൂപയും മാട്ടിറച്ചി 380 രൂപയുമാണ് .

മത്സ്യ ഇനങ്ങളുടെ വില വർദ്ധിച്ചുവെന്നു മാത്രമല്ല, മീനിന് ക്ഷാമവുമായി. നെയ്മീൻ കിലോയ്ക്ക് 900 രൂപയിലെത്തി. വാടി നെയ്മിന് 950 രൂപയാണ്. വറ്റ, കാളാഞ്ചി, മോത തുടങ്ങിയ ഇനങ്ങൾക്ക് വില 400 രൂപയ്ക്ക് മുകളിലാണ് . മത്തി ,അയല, കിളി തുടങ്ങി ചെറിയ ഇനങ്ങൾക്കും 200 രൂപയ്ക്ക് മുകളിൽ കൊടുക്കണം. കായൽ മത്സ്യങ്ങളുടെ വിലയും ഉയർന്നു. വലിപ്പമുള്ള കരിമീൻ കിലോയ്ക്ക് 580 രൂപയിലെത്തി. കായൽ മുരശ് , കായൽ കാളാഞ്ചി വില 400- 440 രൂപയാണ്.

ചൂട് കൂടിയതോടെ കടലിലും കായലിലും മത്സ്യങ്ങൾ കുറഞ്ഞുവെന്ന് തൊഴിലാളികൾ പറയുന്നു. മത്തി, അയല ഇനങ്ങൾ കേരളത്തിലെ കടൽ പ്രദേശങ്ങളിൽ നിന്ന് മറ്റിടങ്ങളിലേക്ക് പലായനം ചെയ്തുവെന്നാണ് വിദഗ്ദ്ധരുടെ വിലയിരുത്തൽ. ഇത് മത്സ്യ മേഖലയുമായി ബന്ധപ്പെട്ട് പ്രവർത്തിക്കുന്നവരുടെ വരുമാനത്തെയും ബാധിച്ചിട്ടുണ്ട്.

 പച്ചക്കറി വില കുറഞ്ഞു

പച്ചക്കറി വില ഏറെക്കാലം ഉയർന്ന ശേഷം കുറഞ്ഞു. സവാള, ഉള്ളി വില കിലോയ്ക്ക് 40 രൂപയിൽ എത്തി. ഉള്ളിവില 80 രൂപ വരെ ഉയർന്നിരുന്നു . 100 രൂപ വരെ ഉയർന്ന തക്കാളി വില കിലോയ്ക്ക് 24 രൂപയായി. 300 രൂപയായിരുന്ന മുരിങ്ങക്ക വില 200ലും താഴ്ന്നു . കാരറ്റ് വില ഇപ്പോഴും 80 ആയി ഉയർന്നു നിൽക്കുന്നു . പയറ്, ബീൻസ്, വെണ്ടക്ക അടക്കം മറ്റ് ഇനങ്ങളുടെ വില 40 രൂപയിൽ താഴെയെത്തി.

 അരിവിലയിൽ കുറവില്ല

പെട്രോൾ, ഡീസൽ വില ഉയർ‌ന്നതിനൊപ്പം ഇടക്കാലത്ത് വർദ്ധിച്ച അരിവില മാറ്റമില്ലാതെ തുടരുകയാണ് . കുത്തരിക്ക് കിലോയ്ക്ക് 45 -50 രൂപയായി. ബ്രാൻഡഡ് അരിക്ക് ഇതിലും കൂടുതലാണ് . പരിപ്പ്, പയർ, ഉഴുന്ന്, വറ്റൽ മുളക് തുടങ്ങിയവയുടെ വിലയും ഉയർന്നു നിൽക്കുന്നു.