കോട്ടയം : കേരളത്തിന്റെ ആരോഗ്യ മേഖലയിലെ പ്രവർത്തനങ്ങൾ ആഗോളതലത്തിൽ മാതൃക സൃഷ്ടിച്ചിരിക്കുകയാണെന്ന് മന്ത്രി വി.എൻ. വാസവൻ പറഞ്ഞു. ലോകക്ഷയരോഗ ദിനാചരണത്തോടനുബന്ധിച്ച് ആരോഗ്യവകുപ്പ് ജില്ലാ പഞ്ചായത്ത് ഹാളിൽ സംഘടിപ്പിച്ച പൊതുസമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. മാതൃശിശു മരണനിരക്ക്, ആയുർ ദൈർഘ്യം, കോവിഡ് പ്രതിരോധം തുടങ്ങിയ പ്രവർത്തനങ്ങളിൽ ലോകത്തെ വിസ്മയിപ്പിക്കുന്ന നേട്ടമാണ് കേരളം കൈവരിച്ചിരിക്കുന്നത്. ക്ഷയരോഗവുമായി ബന്ധപ്പെട്ട് ജനങ്ങളിൽ നിലനിന്നിരുന്ന ഭീതി അകറ്റാനും ആധുനിക മരുന്നുകളും ചികിത്സയും സമയത്ത് ലഭ്യമാക്കാനും സാധിച്ചിട്ടുണ്ട്. ക്ഷയരോഗ പ്രതിരോധ നടപടികളും ആശ്വാസ പ്രവർത്തനങ്ങളും ഊർജ്ജിതമായി തുടരണമെന്നും മന്ത്രി പറഞ്ഞു. തിരുവഞ്ചൂർ രാധാകൃഷ്ണൻ എം.എൽ.എ അദ്ധ്യക്ഷത വഹിച്ചു. ജില്ലാ പഞ്ചായത്ത് പ്രസിഡന്റ് നിർമ്മല ജിമ്മി മുഖ്യാതിഥിയായിരുന്നു. ജില്ലാ പഞ്ചായത്തംഗം കെ.വി.ബിന്ദു, ജില്ലാ മെഡിക്കൽ ഓഫീസർ ഡോ.എൻ.പ്രിയ, കുടുംബശ്രീ ജില്ലാ മിഷൻ കോ-ഓർഡിനേറ്റർ അഭിലാഷ് ദിവാകർ, ആരോഗ്യ കേരളം ജില്ലാ പ്രോഗ്രാം മാനേജർ ഡോ. അജയ് മോഹൻ, ഡെപ്യൂട്ടി ജില്ലാ മെഡിക്കൽ ഓഫീസർ ഡോ.പി.എൻ. വിദ്യാധരൻ, ജില്ലാ ടി.ബി ഓഫീസർ ട്വിങ്കിൾ പ്രഭാകരൻ, ജില്ലാ മാസ് മീഡിയ ഓഫീസർ ഡോമി ജോൺ എന്നിവർ പ്രസംഗിച്ചു. ഡോ. ഷിനോബി കുര്യൻ, ഡോ.എൽ.സന്തോഷ് എന്നിവർ ക്ലാസെടുത്തു.