വാഷിംഗ്ടൺ : മൈക്രോസോഫ്റ്റ് സി.ഇ.ഒ സത്യ നദെല്ലെയുടെ മകൻ സെയ്ൻ നദെല്ല (26)​ അന്തരിച്ചു. തിങ്കളാഴ്ച രാവിലെയായിരുന്നു അന്ത്യം.സെയ്നിന് ജനനം മുതലേ സെറിബ്രൽ പാൾസി രോഗമുണ്ടായിരുന്നു. ഇമെയിലിൽ സന്ദേശത്തിലൂടെയാണ് നദെല്ലെ വിവരം സഹപ്രവർത്തകരെ അറിയിച്ചത്. തന്റെ കുടുംബത്തിന് വേണ്ടി പ്രാർത്ഥിക്കണമെന്നും സന്ദേശത്തിൽ അദ്ദേഹം അഭ്യർഥിച്ചു. 2014ൽ സി.ഇ.ഒ പദവി ഏറ്റെടുത്തതു മുതൽ,​ നദെല്ലെ മൈക്രോസോഫ്റ്റിന്റെ വികലാംഗരായ ഉപയോക്താക്കളെ കൂടി പരിഗണിക്കുന്ന രീതിയിൽ നിരവധി പദ്ധതികൾക്ക് തുടക്കം കുറിച്ചിരുന്നു. കഴിഞ്ഞ വർഷം സെയ്നിന്റെ ചികിത്സകൾ നടന്നിരുന്ന സിയാറ്റിൽ ചിൽഡ്രൻസ് സെന്റർ ഫോർ ഇന്റഗ്രേറ്റീവ് ബ്രെയിൻ റിസർച്ച് സെന്ററിൽ ന്യൂറോ സയൻസ് ഗവേഷണങ്ങൾക്കായി സെയ്ൻ നാദെല്ലയുടെ പേരിൽ ഒരു എൻഡോവ്ഡ് ചെയർ സ്ഥാപിച്ചിരുന്നു.

'സെയ്നിന്റെ സംഗീതത്തിലുള്ള താത്പ്പര്യം, തിളങ്ങുന്ന പുഞ്ചിരി, കുടുംബത്തിനോടുള്ള സ്‌നേഹം, എന്നിവയിലൂടെ അദ്ദേഹം എന്നെന്നും ഓർമ്മിക്കപ്പെടുമെന്ന് സിയാറ്റിൽ ചിൽഡ്രൻസ് ഹോസ്പിറ്റൽ സി.ഇ.ഒ ജെഫ് സ്‌പെറിങ് പറഞ്ഞു.