മഡ്ഗാവ് : കേരള ബ്ളാസ്റ്റേഴ്സിനും ഐ.എസ്.എൽ സെമിഫൈനലിനുമിടയിൽ ഒരേയൊരു മത്സരം മാത്രം. ഞായറാഴ്ച എഫ്.സി ഗോവയ്ക്കെതിരായ ആ മത്സരം തോൽക്കാതിരുന്നാൽ മാത്രം മതി ബ്ളാസ്റ്റേഴ്സിന് അവസാന നാലിൽ ഇടം ഉറപ്പാക്കാൻ. ഒരു പക്ഷേ നാളെ നടക്കുന്ന മത്സരത്തിൽ മുംബയ് സിറ്റിക്ക് ഹൈദരാബാദിനെ തോൽപ്പിക്കാൻ കഴിഞ്ഞില്ലെങ്കിൽത്തന്നെ ബ്ളാസ്റ്റേഴ്സിന്റെ സെമിഫൈനൽ ഉറപ്പാകും.

ശനിയാഴ്ച മുംബയ് ജയിച്ചാലും ഞായറാഴ്ച ബ്ളാസ്റ്റേഴ്സ് ഗോ​വ​യ്ക്കെ​തി​രെ​ ​സ​മ​നി​ല​ പിടിച്ചാൽ ബ്ളാസ്റ്റേഴ്സിനും മുംബയ്‌ക്കും ​ ഒരേ പോയിന്റ് നിലയാകും. നേർക്കുനേർ പോരാട്ടങ്ങളിലെ വിജയത്തിന്റെ മികവിൽ മഞ്ഞപ്പടയ്ക്ക് സെ​മി​യി​ലെ​ത്താം.

കഴിഞ്ഞ രാത്രി നടന്ന നി​ർണായകമത്സരത്തി​ൽ ഒന്നിനെതിരെ മൂന്ന് ഗോളുകൾക്ക് മുംബയ് സി​റ്റി​ എഫ്.സി​യെ കീഴടക്കി​യാണ് കേരള ബ്ളാസ്റ്റേഴ്സ് സെമി​ഫൈനൽ സാദ്ധ്യതകൾ വർദ്ധി​പ്പി​ച്ചത്. ഇരട്ടഗോളുകൾ നേടിയ അൽവാരോ വസ്ക്വേസും ആദ്യ പകുതിയിൽ അവിസ്മരണീയ ഗോളടിച്ച സഹലും ചേർന്നാണ് ബ്ളാസ്റ്റേഴ്സിന് ഗംഭീര വിജയമൊരുക്കിയത്. ആദ്യ പകുതി​യി​ൽ രണ്ട് ഗോളുകൾ നേടി​യി​രുന്ന ബ്ളാസ്റ്റേഴ്സ് രണ്ടാം പകുതി​യിൽ ഒരു ഗോളും കൂടി​യടി​ച്ച് മത്സരത്തി​ന്റെ വി​ധി​ കുറി​ക്കുകയായി​രുന്നു.71-ാം മിനിട്ടിൽ പെനാൽറ്റിയിൽ നിന്നാണ് മുംബയ് ആശ്വാസഗോൾ കണ്ടെത്തിയത്.

19-ാം മിനിട്ടിൽ സഹൽ സ്കോറിംഗ് തുടങ്ങിയപ്പോൾ ആദ്യ പകുതിയുടെ ഇൻജുറി ടൈമിലും 60-ാം മിനിട്ടിലുമായിരുന്നു വസ്ക്വേസിന്റെ ഗോളുകൾ.വസ്ക്വേസിന്റെ ആദ്യ ഗോൾ പെനാൽറ്റിയിൽ നിന്നായിരുന്നു.ഡീഗോ മൗറീഷ്യോയാണ് മുംബയ്ക്ക് വേണ്ടി പെനാൽറ്റി ഗോളാക്കിയത്.

ഈ വിജയത്തോടെ ബ്ളാസ്റ്റേഴ്സ് 19 മത്സരങ്ങളിൽ നിന്ന് 33 പോയിന്റുമായി നാലാം സ്ഥാനത്തേക്ക് ഉയർന്നു.നാലാം സ്ഥാനത്തായിരുന്ന മുംബയ് സിറ്റി 31 പോയിന്റുമായി അഞ്ചാം സ്ഥാനത്തേക്ക് താഴ്ന്നു.

ഈ സീസണിലെ ബ്ളാസ്റ്റേഴ്സിന്റെ ഒൻപതാമത്തെ വിജയമായിരുന്നു കഴിഞ്ഞരാത്രി മുംബയ് സിറ്റിക്കെതിരെ നേടിയത്.

ഈ സീസണിലെ ആദ്യ പാദ മത്സരത്തിൽ കേരള ബ്ളാസ്റ്റേഴ്സ് മുംബയ് സിറ്റിയെ 3-0ത്തിന് തോൽപ്പിച്ചിരുന്നു.

സഹലിന്റെ വണ്ടർ ഗോൾ

ആദ്യ ഇലവനിലേക്ക് തിരികെയെത്തിയ സഹലിന്റെ അതുല്യമായ ഡ്രിബിളിംഗ് പാടവമാണ് ആദ്യ ഗോളിലേക്ക് വഴിതുറന്നത്. എതിർ ഗോൾ മുഖത്തിന് അകലെവച്ച് തനിക്ക് കിട്ടിയ പന്തുമായി രണ്ട് പേരേ അതിമനോഹരമായി കബളിപ്പിച്ച് മുന്നേറിയ സഹൽ ബോക്സിനുള്ളിലേക്ക് കടന്ന് വട്ടം നിന്ന മൂന്ന് ഡിഫൻഡർമാർക്കിടയിലൂടെയാണ് വലയിലേക്ക് പന്ത് ക‌ടത്തിവിട്ടത്.