പാലക്കാട് മലമ്പുഴയിലെ ചെറാട് മലയിൽ കുടുങ്ങിയ ബാബു ഹിമാലയം കയറാനൊരുങ്ങുന്നു. പ്രശസ്ത വ്യവസായി ബോബി ചെമ്മണ്ണൂരിനൊപ്പമാണ് ബാബു ഹിമാലയ യാത്രയ്ക്കൊരുങ്ങുന്നത് . മലമ്പുഴയിലെത്തി ബാബുവിനെ നേരിൽകണ്ടാണ് ബോബി ചെമ്മണ്ണൂർ ഇക്കാര്യം അറിയിച്ചത്. ബോബി ചെമ്മണ്ണൂരിനെ കാണണമെന്ന ബാബുവിന്റെ ആഗ്രഹപ്രകാരമാണ് അദ്ദേഹം നേരിട്ട് എത്തിയത്. ബാബുവിന് ബോചെ സ്വർണനാണയം സമ്മാനിക്കുകയും ചെയ്തു.

ഹിമാലയം കയറാനുള്ള അനുമതിയും പാസ്‌പോർട്ടും മറ്റു കാര്യങ്ങളും ബോബി ശരിയാക്കിക്കൊണ്ടിരിക്കുകയാണെന്നും ബാബു വെളിപ്പെടുത്തി. ഹിമാലയൻ യാത്രയിൽ തന്റെ കൂടെ ചേരാൻ ആഗ്രഹിക്കുന്നവരുടെ ലിസ്റ്റും ശരിയാക്കിവരികയാണ്. ആ യാത്രയ്ക്കുള്ള തയ്യാറെടുപ്പിലാണ് ഇപ്പോഴുള്ളതെന്നും ബാബു സ്വകാര്യ ചാനലിനോട് പറഞ്ഞു.

ഒരു കാര്യം ആത്മാർത്ഥമായി ആഗ്രഹിച്ചാൽ നൂറുശതമാനം അതു കിട്ടുമെന്ന ഉറപ്പിൽ തുടർന്നും പ്രവർത്തിച്ചാൽ അതു നേടിയിരിക്കുമെന്ന് ബോബി ചെമ്മണൂർ പറഞ്ഞു. മരണം മുൻപിൽ കണ്ടിട്ടിട്ടും നൂറുശതമാനം പ്രതീക്ഷയോടെ, രക്ഷപ്പെടുമെന്ന വിശ്വാസത്തോടെ കാത്തിരുന്നതിന്റെ ഫലമാണ് ബാബുവിന് രക്ഷപ്പെടാനായത്. ഇത്രയും വലിയ പ്രതിസന്ധിഘട്ടത്തിലും പിടിച്ചുനിന്നതു തന്നെയാണ് വലിയ സാഹസികത. ബാബുവിന്റെ അടുത്ത യാത്രയിൽ കൂടെ താനുമുണ്ടാകുമെന്നും അദ്ദേഹം വെളിപ്പെടുത്തി.