ഫറ്റോർഡ: ഐ എസ് എല്ലിൽ ഒന്നാം സെമിയുടെ ആദ്യപാദത്തിൽ ജംഷഡ്പൂരിനെതിരെ കേരളാ ബ്‌ളാസ്റ്റേഴ്സിന് ലീഡ്. 38ാം മിനിട്ടിൽ മലയാളി താരം സഹൽ അബ്ദുൾ സമദിന്റെ മനോഹരമായ ഒരു ഗോളിലൂടെയാണ് ബ്‌ളാസ്റ്റേഴ്സ് മുന്നിലെത്തുന്നത്. ഒന്നാം പകുതി അവസാനിച്ചപ്പോൾ ബ്‌ളാസ്റ്റേഴ്സ് 1-0ന് മുന്നിലാണ്.

മത്സരത്തിന്റെ 38ാം മിനിട്ടിലാണ് ഏവരെയും ഞെട്ടിച്ചുകൊണ്ട് സഹലിന്റെ ഗോളെത്തുന്നത്. മൈതാനത്ത് ബ്‌ളാസ്റ്റേഴ്സിന്റെ ഭാഗത്ത് നിന്ന് അൽവാരോ വാസ്ക്വസ് സഹലിനെ ലക്ഷ്യമാക്കി ഒരു ലോംഗ് പാസ് നൽകുകയായിരുന്ന. ജംഷഡ്പൂർ പ്രതിരോധം ഒരുക്കിയ ഓഫ്സൈഡ് ട്രാപ്പ് വിദഗ്‌ദ്ധമായി മറികടന്ന സഹൽ, പന്തിന് വേണ്ടി കുതിച്ചു. ജംഷ്ഡ്പൂരിന്റെ പ്രതിരോധനിരതാരം റിക്കി ലാലാവ്മാവ്വ ഉയർന്നുവന്ന വാസ്ക്വസിന്റെ പാസ് ഹെഡ് ചെയ്ത് അകറ്റാൻ ശ്രമിച്ചെങ്കിലും അത് സഹലിനെ കൂടുതൽ പ്രയോജനം മാത്രമേ ചെയ്തുള്ളൂ. സഹലിന്റെ തൊട്ടുമുന്നിൽ വന്ന് വീണ പന്ത് ഗോൾകീപ്പറിന്രെ തലയ്ക്കുമുകളിലൂടെ കൃത്യമായി വലയിലെത്തിക്കാൻ സഹലിന് സാധിച്ചു. മത്സരത്തിൽ അതുവരെ കാര്യമായ പ്രകടനം പുറത്തെടുക്കാതിരുന്ന സഹൽ ഈയൊറ്റ നിമിഷത്തോടെ കളിയുടെ ഗതി തന്നെ മാറ്റിമറിച്ചു.

അതേസമയം പ്രതീക്ഷിച്ചത് പോലെ കളിയിലുടനീളം ആധിപത്യം പുലർത്തിയിരുന്നത് ജംഷഡ്പൂർ എഫ് സിയായിരുന്നു. മത്സരം തുടങ്ങി പത്താം മിനിട്ടിലും 20ാം മിനിട്ടിലും അവരുടെ മുന്നേറ്റനിരതാരം ഡാനിയേൽ ചുക്‌വുവിന് മികച്ച രണ്ട് അവസരങ്ങൾ ലഭിച്ചിരുന്നു. എന്നാൽ രണ്ട് തവണയും അവസരങ്ങൾ പാഴാക്കുകയായിരുന്നു. ബ്‌ളാസ്റ്റേഴ്സ് കൂടുതലും പ്രതിരോധത്തിൽ ഊന്നി കളിച്ചപ്പോൾ ജംഷഡ്പൂർ ആക്രമിച്ചു കളിക്കുന്ന ശൈലിയാണ് സ്വീകരിച്ചത്.