ചെന്നൈ: വീട്ടിൽ അതിക്രമിച്ചുകയറി നടിയെ ലൈംഗികമായി പീഡിപ്പിക്കുകയും സ്വർണവും പണവും കൊള്ളയടിക്കുകയും ചെയ്‌തതായി പരാതി. ചെന്നൈയിൽ നടന്ന സംഭവത്തിൽ രണ്ട് പേരെ പൊലീസ് അറസ്റ്റുചെയ്തു. ചെന്നൈ മധുരവോയൽ സ്വദേശി സെൽവകുമാർ(21), രാമപുരം സ്വദേശി കണ്ണദാസൻ(37) എന്നിവരാണ് അറസ്റ്റിലായത്. വൽസരവാക്കത്ത് തനിച്ച് താമസിക്കുന്ന 38 കാരിയായ നടിയെയാണ് വീട്ടിലേക്ക് അതിക്രമിച്ച കയറിയ യുവാക്കൾ പീഡിപ്പിച്ചത്. വനിതാ ദിനത്തിൽ രാത്രി പത്തരയോടെയാണ് സംഭവം.

നിരവധി സിനിമകളിൽ സഹനടിയായി വേഷമിട്ട താരമാണ് അതിക്രമത്തിന് ഇരയായ നടി. യുവാക്കൾ കത്തിചൂണ്ടി ഭീഷണിപ്പെടുത്തി 50,000 രൂപയും ഒന്നരപ്പവന്റെ മാലയും കവരുകയും നടിയെ ലൈംഗികമായി പീഡിപ്പിക്കുകയുമായിരുന്നു. സംഭവത്തിൽ നടി പൊലീസിൽ പരാതി നൽകിയിരുന്നു. സി.സി.ടിവി കേന്ദ്രീകരിച്ച് നടത്തിയ അന്വേഷണത്തിലാണ് പ്രതികൾ പിടിയിലായത്. ഇവരിൽ നിന്നും മൂന്ന് ഫോണും സ്വർണവും ഇരുചക്രവാഹനങ്ങളും പിടിച്ചെടുത്തു. എന്നാൽ, നടിയെ ഭീഷണിപ്പെടുത്തി പ്രതികൾ അശ്ലീല ദൃശ്യങ്ങൾ പകർത്തിയതായും പൊലീസ് ഇക്കാര്യം എഫ്.ഐ.ആറിൽ ചേർത്തില്ലെന്നും പരാതിയുണ്ട്.