കീവ് ∙ റഷ്യ- യുക്രെയിൻ യുദ്ധം അവസാനിപ്പിക്കാൻ ഇസ്രായേൽ മുൻകൈയെടുക്കണമെന്ന് യുക്രെയിൻ പ്രസിഡന്റ് വൊളോഡിമിർ സെലെൻസ്‌കി അഭ്യർത്ഥിച്ചു. യുദ്ധം അവസാനിക്കാൻ ഇസ്രായേൽ മധ്യസ്ഥത വഹിക്കണം. റഷ്യയുമായി കൂടിക്കാഴ്ച നടത്താൻ, സംസാരിക്കാൻ അവസരം ഉണ്ടാവണം. അതിനായി ആദ്യം റഷ്യൻ പ്രസിഡന്റ് വ്ലാ‍‍‍ഡിമിർ പുട്ടിനുമായി ജറുസലേമിൽ കൂടിക്കാഴ്ച നടത്താൻ തയ്യാറാമെന്നും സെലൻസ്കി വ്യക്തമാക്കി.
റഷ്യൻ ആക്രമണത്തിൽ ഇതുവരെ യുക്രെയിന്റെ 1300 സൈനികർ കൊല്ലപ്പെട്ടെന്നും സെലൻസ്കി അറിയിച്ചു. നേരത്തെ യുക്രെയിൻ യുദ്ധത്തിന് റഷ്യൻ സൈന്യത്തിലേക്ക് യുവാക്കളെ നിർബന്ധപൂർവം ചേർക്കുന്നെന്ന വാർത്തകൾ വന്നതോടെ റഷ്യൻ അമ്മമാർക്ക് സെലൻസ്കി മുന്നറിയിപ്പ് നൽകിയിരുന്നു. എത്രയും പെട്ടെന്ന് നിങ്ങളുടെ മക്കൾ എവിടെയുണ്ടെന്ന് കണ്ടെത്താനും അവർ സുരക്ഷിതരാണോ എന്ന് അന്വേഷിക്കാനും സെലൻസ്കി ആവശ്യപ്പെടുന്നു. യുക്രെയിൻ ഒരുകാലത്തും ഈ യുദ്ധം ആഗ്രഹിച്ചിരുന്നല്ലെന്നും ഇനി പ്രതിരോധത്തിന് വേണ്ടി എന്ത് മാർഗവും സ്വീകരിക്കാൻ ഒരുക്കമാണെന്നും സെലൻസ്കി വ്യക്തമാക്കുന്നു.