കോഴിക്കോട്: കെ സി വേണുഗോപാലിനെ പുറത്താക്കി കോൺഗ്രസിനെ രക്ഷിക്കണമെന്നാവശ്യപ്പെട്ട് കോഴിക്കോട് നഗരത്തിന്റെ വിവിധ ഭാഗങ്ങളിൽ ഫ്ലക്സ് ബോർഡുകൾ. റെയിൽവേ സ്‌റ്റേഷൻ, പാളയം സബ്‌വേ, മാനാഞ്ചിറ എന്നിവിടങ്ങളിലാണ് ഫ്ലക്സ് ബോർഡുകൾ പ്രത്യക്ഷപ്പെട്ടത്.
'കെ സി വേണുഗോപാലിനെ പുറത്താക്കുക, കോൺഗ്രസിനെ രക്ഷിക്കുക' എന്നാണ് കോൺഗ്രസ് കൂട്ടായ്മയുടെ പേരിൽ സ്ഥാപിച്ച ഫ്ലക്സ് ബോർഡിലുള്ളത്. ഇന്നലെ രാത്രി പത്തരയ്ക്ക് ശേഷമാണ് മലയാളത്തിലും ഇംഗ്ലീഷിലുമുള്ള ഫ്ലക്സ് ബോർഡുകൾ സ്ഥാപിച്ചത്.
നേരത്തെ കണ്ണൂരിലും സമാനരീതിയിൽ ഫ്ലക്സ് ബോർഡുകൾ പ്രത്യക്ഷപ്പെട്ടിരുന്നു. ഉത്തർപ്രദേശും പഞ്ചാബും അടക്കമുള്ള സംസ്ഥാനങ്ങളിൽ നടന്ന നിയമസഭാ തിരഞ്ഞെടുപ്പിലെ കോൺഗ്രസിന്റെ തോൽവിക്ക് ഉത്തരവാദി പാർട്ടിയുടെ മുഖ്യചുമതലയുള്ള കെ സി വേണുഗോപാലാണെന്ന് വിവിധ കോണുകളിൽ നിന്ന് വിമർശനമുയർന്നിരുന്നു.ഇതിനുപിന്നാലെയാണ് ഫ്ലക്സ് ബോർഡുകൾ പ്രത്യക്ഷപ്പെട്ടത്.