ഹൈദരാബാദ്: പ്രശസ്ത തെലുങ്ക് സിനിമാ ഗാനരചയിതാവ് കണ്ടികൊണ്ട യാദഗിരി (48) അന്തരിച്ചു. തൊണ്ടയിൽ അർബുദം ബാധിച്ചതിനെ തുടർന്ന് രണ്ട് വർഷത്തോളം ചികിത്സയിലായിരുന്നു. ശനിയാഴ്ച രാത്രിയിലായിരുന്നു അന്ത്യം.

ആന്ധ്രയിലെ നഗുർലപ്പള്ളിയിലാണ് കണ്ടികൊണ്ട ജനിച്ചത്. ഓസ്‌മാനിയ യൂണിവേഴ്സിറ്റിൽ ഗവേഷണം പൂർത്തിയാക്കിയ ശേഷമാണ് സിനിമയിലെത്തുന്നത്.

2001ൽ പുറത്തിറങ്ങിയ ഇട്ലു ശ്രവണി സുബ്രഹ്മണ്യത്തിലൂടെയായിരുന്നു അരങ്ങേറ്റം. ഇഡിയറ്റ്, ശിവമണി, സത്യം, 143, സൂപ്പർ, ചക്രം, ഭഗീരഥ, പോക്കിരി, ചക്രം, മുന്ന, ധീസ, തുപ്പാക്കി (തെലുങ്ക് ഡബ്ബിംഗ്), സുകുമാരുഡു, ലിംഗ (തെലുങ്ക് ഡബ്ബിംഗ്), ടെംപർ തുടങ്ങി അമ്പതോളം സിനിമകൾക്ക് വേണ്ടി നൂറിലേറെ ഗാനങ്ങൾ രചിച്ചു. എ.ആർ. റഹ്മാൻ, യുവൻ ശങ്കർ രാജ, ഡി. ഇമ്മൻ, ഹാരിസ് ജയരാജ്, മണി ശർമ തുടങ്ങിയ പ്രശസ്ത സംഗീത സംവിധായകർക്കൊപ്പം പ്രവർത്തിച്ചു. കണ്ടികൊണ്ടയുടെ വിയോഗത്തിൽ തെലുങ്കു സിനിമാപ്രവർത്തകർ അനുശോചിച്ചു.