ന്യൂഡൽഹി: നവ്ജ്യോത് സിംഗ് സിദ്ധു അടക്കം നിയമസഭ തിരഞ്ഞെടുപ്പിൽ പരാജയം നേരിട്ട അഞ്ച് സംസ്ഥാനങ്ങളിലെയും കോൺഗ്രസ് അദ്ധ്യക്ഷന്മാരോട് അവരുടെ സ്ഥാനങ്ങൾ ഒഴിയാൻ സോണിയ ഗാന്ധി ആവശ്യപ്പെട്ടു. ഉത്തർപ്രദേശ്, ഉത്തരാഖണ്ഡ്, പഞ്ചാബ്, ഗോവ, മണിപ്പൂർ എന്നിവിടങ്ങളിലെ കോൺഗ്രസ് അദ്ധ്യക്ഷന്മാരോടാണ് ദേശീയ അദ്ധ്യക്ഷയായ സോണിയ ഗാന്ധി ഒഴിയാൻ ആവശ്യപ്പെട്ടത്.

Congress President, Smt. Sonia Gandhi has asked the PCC Presidents of Uttar Pradesh, Uttarakhand, Punjab, Goa & Manipur to put in their resignations in order to facilitate reorganisation of PCC’s.

— Randeep Singh Surjewala (@rssurjewala) March 15, 2022

തിരഞ്ഞെടുപ്പിൽ കനത്ത തോൽവി നേരിട്ട ഈ സംസ്ഥാനങ്ങളിൽ പാർട്ടിയുടെ പുനസംഘടന ലക്ഷ്യമിട്ടാണ് സോണിയ ഗാന്ധി സംസ്ഥാന അദ്ധ്യക്ഷന്മാരോട് സ്ഥാനങ്ങൾ ഒഴിയാൻ ആവശ്യപ്പെടുന്നതെന്ന് പാർട്ടി നേതാവ് രൺദീപ് സിംഗ് സുർജേവാല വ്യക്തമാക്കി. സോണിയാ ഗാന്ധിയുടെ തീരുമാനം അറിയിച്ചു കൊണ്ടുള്ള സുർജേവാലയുടെ ട്വീറ്റ് എത്തി മിനിട്ടുകൾക്കകം ഗോവ, ഉത്തരാഖണ്ഡ് സംസ്ഥാന അദ്ധ്യക്ഷന്മാർ രാജിവയ്ക്കുന്നതായി അറിയിച്ചു. പഞ്ചാബിൽ നവ്ജ്യോത് സിംഗ് സിദ്ധു, ഉത്തരാഖണ്ഡിൽ ഗണേഷ് ഗൊഡിയാൽ, ഗോവയിൽ ഗിരീഷ് ചൊടാൻകർ, മണിപൂരിൽ ലോകൻ സിംഗ്, ഉത്തർപ്രദേശിൽ അജയ് കുമാർ ലല്ലു എന്നീ സംസ്ഥാന അദ്ധ്യക്ഷന്മാർക്കാണ് അവരുടെ പാർട്ടിയിലെ സ്ഥാനങ്ങൾ നഷ്ടമാകുന്നത്.