ഒരിടവേളയ്ക്ക് ശേഷം മഞ്ജുവാര്യരും ബിജുമേനോനും ഒന്നിച്ചെത്തിയ ചിത്രമാണ് ലളിതം സുന്ദരം. ഡിസ്നി പ്ലസ് ഹോട്ട്സ്റ്റാറിലൂടെയാണ് ചിത്രം റിലീസ് ആയിരിക്കുന്നത്. മഞ്ജു വാര്യരുടെ സഹോദരനും നടനുമായ മധു വാര്യരാണ് ചിത്രം സംവിധാനം ചെയ്തിരിക്കുന്നത്. ഇദ്ദേഹത്തിന്റെ ആദ്യ സംവിധാന സംരംഭമാണിത്. വിനീത് ശ്രീനിവാസൻ ആലപിച്ച ഒരു മനോഹര ഗാനത്തോടെയാണ് ചിത്രം ആരംഭിക്കുന്നത്. ടെെറ്റിൽ ക്രെ‌ഡിറ്റ്സിനൊപ്പമുള്ള നൊസ്റ്റാൾജിക്ക്‌ ഫീൽ തരുന്ന ഈ ഇൻട്രോ ഗാനം ആദ്യമേ ചിത്രത്തിന്റെ മൂഡ് സെറ്റ് ചെയ്യുന്നു.
കുടുംബ ബന്ധങ്ങളുടെ കഥ പറയുന്ന ഒരു കൊച്ചു ചിത്രമാണ് ലളിതം സുന്ദരം. ഫാമിലി ഫീൽ ഗുഡ് ചിത്രമെന്ന ഗണത്തിൽ ലളിതം സുന്ദരത്തെപ്പെടുത്താം.പ്രേക്ഷകർ കാത്തിരുന്നത് പോലെ ബിജു മേനോൻ- മഞ്ജു കോംബോ തന്നെയാണ് ചിത്രത്തിന്റെ ഹെെലെെറ്റ്. ഇരുവരും തങ്ങളുടെ വേഷം ഗംഭീരമാക്കി. പേര് പോലെ തന്നെ ചിത്രം ലളിതമാണ്. ഒരു ചെറിയ കഥ, ഇടുക്കി പശ്ചാത്തലമാക്കി സംവിധായകൻ പറഞ്ഞുപോകുന്നു. കുടുംബ പ്രേക്ഷകർക്ക് തിരക്കുകളൊക്കെ മാറ്റി വച്ച് കൊണ്ട് റിലാക്സ് ചെയ്ത് കാണാനാകുന്ന തരത്തിലുള്ള ചിത്രമാണ് മധു വാര്യർ ഒരുക്കിയിരിയ്ക്കുന്നത്.
ജീവിതത്തിലെ തിരക്കുകൾക്കിടയിൽ അച്ഛനമ്മമാരെ ശ്രദ്ധിയ്ക്കാനോ അവരുടെ കൂടെ സമയം ചിലവഴിക്കാനോ പലർക്കും സാധിക്കാറില്ല. പലപ്പോഴും കുടുംബത്തിലെ അംഗങ്ങൾ ഓരോ സ്ഥലത്തായിരിയ്ക്കും. ഇത്തരത്തിൽ ജോലിത്തിരക്കുകൾക്കിടയിൽ ഒന്ന് ഒത്ത് ചേരാൻ പോലും സമയം കിട്ടാത്ത ഒരു കുടുംബത്തിന്റെ കഥയാണ് ലളിതം സുന്ദരം പറയുന്നത്. ഒടുവിൽ നിർബന്ധങ്ങൾക്ക് വഴങ്ങി അമ്മയുടെ ഓ‌ർമ്മ ദിവസം ഇവർ ഒത്ത് കൂടുന്നു. പിന്നീട് ഈ കുടുംബത്തിൽ നടക്കുന്ന സുന്ദരമായ നിമിഷങ്ങളിലൂടെയാണ് ചിത്രം സഞ്ചരിയ്ക്കുന്നത്.
സ്നേഹവും കണ്ണീരണിയിക്കുന്ന ചില മുഹൂർത്തങ്ങളും കുഞ്ഞ് തമാശകളും ഒക്കെ ചേർന്നതാണ് ലളിതം സുന്ദരം. സിറ്റുവേഷണൽ കോമ‌ഡികൾ കൊണ്ട് ചിത്രം സമ്പന്നമാണ്. മനോഹരമായ ഗാനങ്ങളും പശ്ചാത്തല സംഗീതവും ചിത്രത്തെ കൂടുതൽ സുന്ദരമാക്കുന്നു. സിനിമാറ്റോഗ്രഫിയും കയ്യടി അർഹിക്കുന്നുണ്ട്. സിനിമയുടെ ക്ലെെമാക്സിനോട് അടുക്കുമ്പോൾ തിരക്കഥയിലെ ചില പ്രശ്നങ്ങൾ മുഴച്ച് നിൽക്കുന്നത് പോരായ്‌മ തന്നെയാണ്. എങ്കിൽ പോലും അത് പ്രേക്ഷകനെ അലോസരപ്പെടുത്താത്ത രീതിയിൽ ചിത്രമൊരുക്കുന്നതിൽ സംവിധായകൻ വിജയിച്ചിട്ടുണ്ട്.
പ്രമോദ് മോഹനാണ് ചിത്രത്തിന്റെ തിരക്കഥ. ഗാനരചന നിര്‍വഹിച്ചിരിക്കുന്നത് ബി കെ ഹരിനാരായണനാണ്. ബിജിപാലാണ് സംഗീതം. പി. സുകുമാർ, ഗൗതം ശങ്കർ എന്നിവരാണ് ഛായാഗ്രഹണം. സെഞ്ച്വറിയും മഞ്ജു വാര്യർ പ്രൊഡക്ഷൻസും ചേർന്നാണ് ചിത്രം നിർമ്മിച്ചിരിക്കുന്നത്. ബിജു മേനോനെയും മഞ്ജു വാര്യരെയും കൂടാതെ സെറീന വഹാബ്, രഘുനാഥ് പലേരി, സൈജു കുറുപ്പ്, സുധീഷ്, ,ദീപ്തി സതി, അനു മോഹൻ തുടങ്ങി താരങ്ങളും ചിത്രത്തിൽ അണിനിരക്കുന്നു. ഓരോ കഥാപാത്രവും അവരർഹിക്കുന്ന തരത്തിലുള്ള ഇടം നൽകാൻ സംവിധായകൻ പ്രത്യേകം ശ്രദ്ധിച്ചിട്ടുണ്ട്. ഇതിൽ സുധീഷിന്റെ പ്രകടനം എടുത്ത് പറയേണ്ടത് തന്നെയാണ്.
പരസ്പരം തുറന്ന് സംസാരിക്കാൻ സമയം കണ്ടെത്താത്തതാണ് പല ബന്ധങ്ങളുടെയും പ്രശ്നങ്ങൾക്ക്‌ കാരണം എന്ന സന്ദേശം കൂടി ലളിതം സുന്ദരം മുന്നോട്ട് വയ്ക്കുന്നുണ്ട്. ഹോമിന് ശേഷം മലയാളി പ്രേക്ഷകർക്ക് മറ്റൊരു സുന്ദര അനുഭവമായി ലളിതം സുന്ദരം മാറുമെന്ന് ഉറപ്പ്.
