പാലക്കാട്: അട്ടപ്പാടിയിൽ ഡി വൈ എഫ് ഐ നേതാവിന് പൊലീസിന്റെ മർദ്ദനമെന്ന് പരാതി. ഡി വൈ എഫ് ഐ അഗളി മുൻ മേഖലാ സെക്രട്ടറി മണികണ്ഠേശ്വരനാണ് പൊലീസിന്റെ മ‌ർദ്ദനമേറ്റത്. ഇന്ന് വൈകുന്നേരം പാലക്കാട് കോട്ടത്തറ ആശുപത്രിക്ക് മുന്നിൽ വച്ച് വാഹനത്തിന് സൈഡ് കൊടുക്കുന്നതുമായി ബന്ധപ്പെട്ട് രണ്ട് സംഘങ്ങൾ തമ്മിൽ തർക്കം നടന്നിരുന്നു. ഇതിനിടയിലാണ് മണികണ്ഠേശ്വരന് പൊലീസിന്റെ മ‌ർദ്ദനമേറ്റതെന്നാണ് പരാതി. അതേസമയം ഹെൽമറ്റ് കൊണ്ട് ആക്രമിക്കാൻ ശ്രമിച്ചപ്പോൾ തടയുക മാത്രമാണ് ചെയ്തതെന്നാണ് പൊലീസ് പറയുന്നത്. പൊലീസുകാരൻ മണികണ്ഠേശ്വരനെ കൈവീശി അടിക്കുന്നതും കൂടെയുള്ളവർ തടയാൻ ശ്രമിക്കുന്നതുമായ വീഡിയോയും പുറത്തുവന്നിട്ടുണ്ട്.