ഹൈദരാബാദ്: ഭാര്യ മട്ടൻകറി ഉണ്ടാക്കിത്തരാത്തതിൽ പ്രകോപിതനായ യുവാവ് പൊലീസിനെ വിളിച്ച് പരാതി പറഞ്ഞു. തെലങ്കാനയിലാണ് സംഭവം. നവീൻ എന്നയാളാണ് 100ൽ വിളിച്ച് പരാതി പറഞ്ഞത്. പൊലീസ് ആദ്യം ഇത് ഗൗനിച്ചില്ല. തുടരെത്തുടരെ വിളിച്ചതോടെ യുവാവിനെ അറസ്റ്റ് ചെയ്തു.

വെള്ളിയാഴ്ച രാത്രി പ്രതി മദ്യപിച്ച ശേഷമാണ് വീട്ടിലെത്തിയത്. കടയിൽ നിന്ന് വാങ്ങിയ മട്ടൻ കൊണ്ട് കറിയുണ്ടാക്കിത്തരാൻ നവീൻ ആവശ്യപ്പെട്ടെങ്കിലും ഭാര്യ വിസമ്മതിച്ചു. ഇതോടെ നവീൻ 100ൽ വിളിച്ചു. ആദ്യം പൊലീസ് ഇത് കാര്യമായെടുത്തില്ല. എന്നാൽ ശല്യം തുടർന്നതോടെ പൊലീസ് ഗൗരരാരം ഗ്രാമത്തിലെ നവീന്റെ വീട്ടിലെത്തി. ഇയാൾ അവശനിലയിലാണെന്ന് മനസിലായതോടെ അപ്പോൾ മടങ്ങി.

ഇന്നലെ രാവിലെ വീണ്ടും കനഗൽ പൊലീസ് നവീന്റെ വീട്ടിലെത്തി, ഇയാളെ കസ്റ്റഡിയിലെടുക്കുകയായിരുന്നു. മദ്യപിച്ച് പൊതു ശല്യമുണ്ടാക്കിയതുൾപ്പെടെയുള്ള വകുപ്പുകൾ നവീന് മേൽ ചുമത്തി. അടിയന്തര സാഹചര്യങ്ങളിൽ പൊലീസിനെ വിളിക്കേണ്ട 100 നമ്പറിൽ അനാവശ്യമായി വിളിച്ച് ദുരുപയോഗം ചെയ്യരുതെന്ന് പൊലീസ് മുന്നറിയിപ്പ് നൽകി.