കൊൽക്കത്ത: ഐ ലീഗിൽ ഗോകുലം കേരള എഫ് സി സുപ്രധാന മത്സരത്തിൽ ഒന്നാം സ്ഥാനത്തുള്ള മുഹമ്മദൻസ് സ്‌പോർട്ടിംഗിനെ നേരിടും. നാളെ രാത്രി 8 മണിക്ക് നൈഹാട്ടി സ്റ്റേഡിയത്തിൽ വച്ചാണ് മത്സരം. നാളത്തെ മത്സരത്തിൽ വിജയിച്ചാൽ ഗോകുലത്തിനു ലീഗിൽ ഒന്നാമതെത്തും. നിലവിൽ അഞ്ച് കളികളിൽ നിന്ന് 13 പോയിന്റുമായി രണ്ടാം സ്ഥാനത്തതാണ് ഗോകുലം. മുഹമ്മദൻസിന് ആറ് മത്സരങ്ങളിൽ നിന്ന് 15 പൊയിന്റുമായി ഒന്നാം സ്ഥാനത്താണ് മുഹമ്മദൻസ്.

ഇത് വരെ ഒരു മത്സരത്തിലും തോൽവി അറിയാതെയാണ് ഗോകുലത്തിന്റെ കുതിപ്പ്. ഏഴു ഗോളുകളുമായി സ്ലോവേനിയൻ താരം ലൂക്ക ഗോകുലത്തിനു വേണ്ടി ഗോൾ പട്ടികയിൽ മുന്നിലാണ്. ജിതിൻ എം എസ് മൂന്നു ഗോളുകളും, ജമൈക്കൻ താരം ജോർദാൻ ഫ്‌ളെച്ചർ രണ്ടു ഗോളുകളും ഇത് വരെ നേടിയിട്ടുണ്ട്.

15 ഗോളുകളോടെ ഗോകുലമാണ് ഏറ്റവും കൂടുതൽ ഗോളുകൾ നേടിയ ടീം. അതേസമയം, മുഹമ്മദൻസ് മുൻ ഗോകുലം താരം മാർക്കസ് ജോസെഫിന്റെ പിൻബലത്തിലാണ് ലീഗിൽ മുന്നേറുന്നത്. മാർക്കസ് ഇതുവരെ ഒമ്പതു ഗോളുകൾ നേടിയിട്ടുണ്ട്.

'വളരെ പ്രധാനപ്പെട്ട മത്സരമാണ് നാളത്തേത്. ലീഗിൽ മുന്നിൽ വരുവാനുള്ള സുവർണാവസരമാണ് നാളത്തെ മത്സരം. കഴിഞ്ഞ മൂന്ന് മത്സരങ്ങളിൽ നമ്മൾ 14 ഗോളുകളാണ് സ്‌കോർ ചെയ്തത്,' ഗോകുലം കേരള എഫ് സി ഹെഡ് കോച്ച് വിൻസെൻസോ ആൽബർട്ടോ അന്നീസ് പറഞ്ഞു.