ശ്രീന​ഗർ: ജമ്മു കാശ്മീരിന്റെ പ്രത്യേക പദവി എടുത്ത കളഞ്ഞ ശേഷം മേഖലയിൽ വൻ നിക്ഷേപ സാദ്ധ്യത തേടി ഗൾഫ് ബിസിനസ് സമ്മിറ്റ്. ഇതിന്റെ ഭാഗമായി യു.എ.ഇയിലെയും സൗദി അറേബ്യയിലെയും ഉന്നതതല ബിസിനസ് സംഘം കാശ്മീർ സന്ദർശിച്ചു. ഇന്ന് നടക്കുന്ന ​ഗൾഫ് ബിസിനസ് സമ്മിറ്റിലും ഇവർ പങ്കെടുക്കും. ജമ്മു കാശ്മീരിലെ നിക്ഷേപ സാദ്ധ്യതകൾ സമ്മിറ്റിൽ ചർച്ചയാവും. കാശ്മീരിൽ നിക്ഷേപം നടത്താൻ യു.എ.ഇ നേരത്തെ ധാരണയിലെത്തിയിരുന്നു. എന്നാൽ സൗദി അറേബ്യൻ കമ്പനി ആദ്യമായാണ് കാശ്മീരിനെ നിക്ഷേപത്തിന് പരി​ഗണിക്കുന്നത്.

യു.എ.ഇ, സൗദി, ഹോങ്കോംഗ് എന്നിവിടങ്ങളിൽ നിന്നായി 33 കമ്പനികളുടെ പ്രതിനിധികളാണ് കാശ്മീരിലെത്തിയിരിക്കുന്നത്. യു.എ.ഇയിലെ അൽ ഹഷെമി ​ഗ്രൂപ്പ്, എമിറേറ്റ് റോയൽ ഇന്റർനാഷണൽ ​ഗ്രൂപ്പ്, അൽ തയർ ​ഗ്രൂപ്പ്, തുടങ്ങിയ കമ്പനികളുടെ സി.ഇ.ഒമാരാണ് കാശ്മീരിലെത്തിയത്. സൗദിയിലെ ആൽഫ സ്കൈ ​ഗ്രൂപ്പിലെ പ്രതിനിധികളും കാശ്മീരിലെത്തി. ഹോസ്പിറ്റാലിറ്റി, ടൂറിസം മേഖലകളിലെ നിക്ഷേപമാണ് കമ്പനികൾ ലക്ഷ്യമിടുന്നത്.