കണ്ണൂര്‍: അപകടങ്ങളിൽ നിന്ന് രക്ഷപ്പെടുന്നത് വലിയ ഭാഗ്യമാണ്. ഇങ്ങനെ അദ്ഭുതകരമായി വാഹനാപകടങ്ങളിൽ നിന്ന് രക്ഷപ്പെടുന്ന വീഡിയോകൾ ശ്രദ്ധ നേടാറുണ്ട്, ഇത്തരത്തിൽ വലിയ ഒറു അപകടത്തിൽ നിന്ന് ഒരു കുട്ടി രക്ഷപ്പെടുന്ന വീഡിയോ ആണ് സോഷ്യൽ മീഡിയയിൽ ഇപ്പോൾ പ്രചരിക്കുന്നത്. കണ്ണൂര്‍ ജില്ലയിലെ തളിപ്പറമ്പിനടുത്ത് ചൊറുക്കളയില്‍ ഞായറാഴ്ച വൈകിട്ടായിരുന്നു സംഭവം നടന്നത്.
വാഹനങ്ങള്‍ കടന്നുപോകുന്ന റോഡിന്റെ അരികില്‍നിന്ന് സൈക്കിളില്‍ അതിവേഗത്തിലെത്തിയ കുട്ടി, വാഹനങ്ങള്‍ക്കടിയില്‍പ്പെടാതെ അത്ഭുതകരമായി രക്ഷപ്പെടുന്നതാണ് പുറത്തുവന്നിരിക്കുന്ന ദൃശ്യത്തിലുള്ളത്. അതിവേഗത്തിലെത്തി, ആദ്യം ബൈക്കില്‍ ഇടിച്ച ശേഷം കുട്ടിയും സൈക്കിളും റോഡിലേക്ക് തെറിച്ചുവീഴുന്നു. പിന്നാലെ വന്ന കെ.എസ്.ആ‍ർ.ടി.സി ബസ് സൈക്കിളിന് മുകളിലൂടെ കയറിയിറങ്ങുന്നു. എന്നാല്‍ കുട്ടിയാകട്ടെ അത്ഭുതകരമായി ഒരു പോറല്‍ പോലുമേല്‍ക്കാതെ റോഡിന്റെ മറുവശത്തേക്ക് തെന്നിനീങ്ങുന്നു.. ആരുടെയും ശ്വാസംനിലപ്പിക്കുന്ന കാഴ്ചയാണ് സി.സി.ടിവിയില്‍ പതിഞ്ഞിരിക്കുന്നത്.