മുംബയ്: ലാക്മെ ഫാഷൻ വീക്ക് 2022 ഷോയിലെ താരമായി ആം ആദ്മി പാർട്ടിയുടെ യുവ എംപിയും നടനുമായ രാഘവ് ഛദ്ദ. ബോളിവുഡ് താരം അപർശക്തി ഖുറാനയ്‌ക്കൊപ്പമാണ് അദ്ദേഹം റാംപ് വാക്ക് നടത്തിയത്. രാഘവ് ഛദ്ദയുടെ അമ്മാവനും ഡിസൈനറുമായയ പവൻ സച്ച്‌ദേവയ്ക്കായാണ് അദ്ദേഹം റാംപിലേക്ക് എത്തിയത്. ഇത് അദ്ദേഹത്തിന്റെ ആദ്യത്തെ റാംപ് വാക്ക് കൂടിയാണ്. കറുത്ത ലെതർ ജാക്കറ്റും പാന്റ്സും ഓറഞ്ച് ബെൽറ്റുമാണ് രാഘവ് ധരിച്ചിരുന്നത്. അദ്ദേഹത്തിന്റെ റാംപ് വാക്ക് ഇതിനോടകം തന്നെ നിരവധി പേരാണ് സാമൂഹിക മാദ്ധ്യമങ്ങളിൽ പങ്കു വച്ചത്.

ആം ആദ്മിയുടെ മുൻനിര നേതാക്കളിൽ ഒരാളായ ഛദ്ദയെ അടുത്തിടെ രാജ്യസഭാ ഉപതെരഞ്ഞെടുപ്പിലേക്ക് പാർട്ടി നാമനിർദേശം ചെയ്തിരുന്നു. ഛദ്ദയും മറ്റ് നാല് എഎപി നേതാക്കളും ഇക്കഴിഞ്ഞ വ്യാഴാഴ്ചയാണ് രാജ്യസഭയിലേക്ക് എതിരില്ലാതെ തിരഞ്ഞെടുക്കപ്പെട്ടത്.

അശോക് കുമാർ മിത്തൽ, ഹർഭജൻ സിംഗ്, സന്ദീപ് പഥക്, സഞ്ജീവ് അറോറ എന്നിവരാണ് രാജ്യസഭയിലേക്ക് തിരഞ്ഞെടുക്കപ്പെട്ട മറ്റുള്ളവർ. 33 വയസ്സ് മാത്രമുള്ള രാഘവ് ഛദ്ദയാണ് നിലവിലെ രാജ്യസഭയിലെ പ്രായം കുറഞ്ഞ രാജ്യസഭാംഗം. അടുത്തിടെ നടന്ന പഞ്ചാബ് നിയമസഭാ തിരഞ്ഞെടുപ്പിലും അദ്ദേഹം നിർണ്ണായക പങ്ക് വഹിച്ചിരുന്നു. തിരഞ്ഞെടുപ്പിൽ 117ൽ 92 സീറ്റുകൾ നേടിയാണ് ആം ആദ്മി പാർട്ടി പഞ്ചാബിൽ അധികാരത്തിലെത്തിയത്.