ന്യൂഡൽഹി : അഞ്ച് സംസ്ഥാനങ്ങളിലെ നിയമസഭാ തിരഞ്ഞെടുപ്പി്ന് ശേഷം പാടേ തകർന്ന കോൺഗ്രസിന്റെ ഉയിർത്തെഴുന്നേൽപ്പിന് തിരഞ്ഞെടുപ്പ് തന്ത്രജ്ഞൻ പ്രശാന്ത് കിഷോറിനെ രംഗത്തിറക്കാൻ നേതൃത്വം ആലോചിക്കുന്നു. ഉത്തർപ്രദേശ്, പഞ്ചാബ്, ഉത്തരാഖണ്ഡ്, ​ഗോവ, മണിപ്പൂർ എന്നീ അഞ്ച് സംസ്ഥാനങ്ങളിലെ തിരഞ്ഞെടുപ്പിന് മുമ്പ് പ്രശാന്ത് കിഷോറും സോണിയ ​ഗാന്ധിയും, രാഹുൽ ​ഗാന്ധിയും കൂടിക്കാഴ്ച നടത്തിയിരുന്നുവെങ്കിലും ചർച്ചകൾ മുന്നോട്ട് പോയിരുന്നില്ല. എന്നാൽ കനത്ത പരാജയത്തിന് പിന്നാലെ കോൺഗ്രസിന്റെ പ്രമുഖ നേതാക്കൾ തന്നെ പ്രശാന്ത് കിഷോറുമായുള്ള ചർച്ചകൾക്ക് മുൻകൈയെടുക്കുകയായിരുന്നു.

അതേസമയം 2024 ലോക്സഭാ തിരഞ്ഞെടുപ്പിന് മുമ്പായി ​ഗുജറാത്തിലും, കർണാടക, ഹിമാചൽ പ്രദേശ് എന്നീ സംസ്ഥാനങ്ങളിലും നടക്കാനുളള നിയമസഭാ തിരഞ്ഞെടുപ്പിൽ കോൺ​ഗ്രസിന്റെ തിരഞ്ഞെടുപ്പ് തന്ത്രജ്ഞനാവാൻ പ്രശാന്ത് കിഷോറിന് താത്പര്യമില്ലെന്നാണ് റിപ്പോർട്ടുകൾ. ഉയർന്നതലത്തിൽ തീരുമാനങ്ങൾ എടുക്കാൻ കഴിയുന്ന ഒരു രാഷ്ട്രീയ നേതാവിന്റെ റോൾ ആണ് പ്രശാന്ത് കിഷോർ ആ​ഗ്രഹിക്കുന്നത്. ഇതിൽ ​ഗാന്ധി കുടുംബത്തിന് അഭിപ്രായ വ്യത്യാസമില്ലെങ്കിലും ജി 23 നേതാക്കളടക്കമുളളവർക്ക് വിരുദ്ധ അഭിപ്രായമാണുളളത്. അതിനാലാണ് നേരത്തെ പ്രശാന്ത് കിഷോറുമായി നടന്ന ചർച്ചകൾ നിന്നുപോയത്.

സംസ്ഥാനങ്ങളിലെ തിരഞ്ഞെടുപ്പ് പരാജയത്തിന് ശേഷം വീണ്ടും പ്രശാന്ത് കിഷോറുമായി ചർച്ചകൾ ആരംഭിക്കുമ്പോൾ പഴയ എതിർപ്പുകൾ ഉയരാനിടയില്ലെന്നാണ് കരുതുന്നത് . പ്രശാന്ത് കിഷോറിനെ തങ്ങളുടെ ഭാ​ഗമാക്കി തിരഞ്ഞെടുപ്പ് വിജയങ്ങൾ കരസ്ഥമാക്കണമെന്ന് സംസ്ഥാന നേതൃത്വങ്ങളും പ്രവർത്തകരും ആവശ്യപ്പെടുന്നുണ്ട്.

രാജസ്ഥാൻ, മധ്യപ്രദേശ്, ഛത്തീസ്​ഗഡ്, അസം, ഹരിയാന, ജാർഖണ്ഡ്, ഹിമാചൽ പ്രദേശ്, ​ഗുജറാത്ത്, മഹാരാഷ്ട്ര, ഉത്തരാഖഢ് എന്നീ സംസ്ഥാനങ്ങളിൽ ബി.ജെ.പിയോട് നേരിട്ട് മത്സരിക്കുന്ന പാർട്ടിയാണ് കോൺ​ഗ്രസ്. ഇവിടങ്ങളിൽ പാർട്ടി പ്രവർത്തനം ശക്തമാക്കി തിരഞ്ഞെടുപ്പ് വിജയം കരസ്ഥമാക്കിയാൽ ദേശീയ തലത്തിൽ കോൺ​ഗ്രസിന്റെ പ്രസക്തി ഉയർത്തിപിടിക്കാനാവുമെന്നാണ് പ്രശാന്ത് കിഷോറിന്റെ അഭിപ്രായം. 200 ലോകസഭാ മണ്ഡലങ്ങളിലാണ് കോൺ​ഗ്രസ് ബി.ജെ.പിയുമായി നേരിട്ടു മത്സരിക്കുന്നത്.

കോൺഗ്രസിന്റെ പ്രവർത്തനത്തിന്റെ രൂപം മാറ്റണമെന്നാണ് പ്രശാന്ത് കിഷോർ മുന്നോട്ട് വയ്ക്കുന്ന ആശയം. തിരഞ്ഞെടുപ്പ് മാനേജ്‌മെന്റ്, ഫണ്ട് ശേഖരണം, പരിശീലനം, സാമൂഹിക മാധ്യമങ്ങളിലെ നയം, ഉത്തരവാദിത്തം, സുതാര്യത, സഖ്യ ചർച്ചകൾ എന്നിവ കോൺ​ഗ്രസിൽ വേണം. സമീപകാല തിരഞ്ഞെടുപ്പ് പരാജയത്തിന്റെ പശ്ചാത്തലത്തിൽ, വലിയ മാറ്റങ്ങൾക്ക് തുടക്കമിടാനുള്ള ഏറ്റവും നല്ല അവസരമാണ് ഈ പ്രയാസകരമായ സമയമെന്ന് കിഷോർ സൂചിപ്പിച്ചതായും പറയുന്നു. ജി 23 വിമതരുമായുളള തർക്കമടക്കം പരിഹരിക്കുന്നതിന് പ്രശാന്ത് കിഷോറിന് സാധിക്കുമെന്നാണ് ​ഗാന്ധി കുടുംബം പ്രതീക്ഷിക്കുന്നതെന്നും റിപ്പോർട്ടുകളുണ്ട്. ഗുജറാത്തിലെ കോണ്‍ഗ്രസ് നേതൃത്വം ഇത്തവണ സമഗ്രമായ പദ്ധതികള്‍ വേണമെന്ന നിലപാടിലാണ്. പ്രശാന്ത് കിഷോറിനെ കൊണ്ടുവരുന്നത് പാര്‍ട്ടിക്ക് ഗുണം ചെയ്യുമെന്നും സംസ്ഥാന നേതൃത്വം കരുതുന്നുണ്ട്. വിഷയത്തില്‍ അന്തിമ തീരുമാനം രാഹുല്‍ ഗാന്ധിക്ക് വിട്ടിരിക്കുകയാണ്.