ചെങ്ങന്നൂർ: ചെറിയനാട് വീടിന്റെ വരാന്തയിൽ പാർക്ക് ചെയ്തിരുന്ന സ്‌കൂട്ടർ രാത്രിയിൽ തീയിട്ട നിലയിൽ. ശനിയാഴ്ച രാത്രിയായിരുന്നു സംഭവം. തീ വീട്ടിലേക്കു പടരാനുള്ള സാഹചര്യം നാട്ടുകാരുടെ ഇടപെടലും ഭാഗ്യവും കൊണ്ടു മാത്രമാണ് ഒഴിവായത്. ചെറിയനാട് മൂന്നാം വാർഡിൽ വാടകയ്ക്കു താമസിക്കുന്ന വീട്ടമ്മയും രണ്ടു പെൺമക്കളും അടങ്ങിയ കുടുംബത്തിന്റെ സ്കൂട്ടറാണ് കത്തിനശിച്ചത്. സംഭവം നടക്കുമ്പോൾ വീട്ടമ്മയും മക്കളും മാത്രമാണ് വീട്ടിലുണ്ടായിരുന്നത്. സ്കൂട്ടർ പൂർണമായും കത്തിനശിച്ചു. തീ പടർന്നു വീട്ടിലാകെ പുക നിറഞ്ഞ നിലയിലായിരുന്നു.

നേരത്തെ ഇവർ താമസിക്കുന്ന വീടിന്റെ കുളിമുറിക്കു സമീപം മൊബൈൽ ക്യാമറ വഴി ദൃശ്യങ്ങൾ പകർത്താൻ ശ്രമിച്ചതിനു അയൽവാസിയായ ഒരു യുവാവിനെതിരെ കേസെടുത്തിരുന്നു. സ്കൂട്ടർ കത്തിച്ചത് ഇതിന്റെ പകപ്പോക്കലാണോയെന്ന് പൊലീസിന് സംശയമുണ്ട്. ഇക്കാര്യം പരിശോധിക്കുകയാണെന്ന് ചെങ്ങന്നൂർ പൊലീസ് അറിയിച്ചു. സംഭവത്തിൽ അന്വേഷണം ആരംഭിച്ചു.