കൊച്ചി: കെ - റെയിൽ പദ്ധതിക്കെതിരായ രണ്ട് ഹർജികൾ ഹൈക്കോടതി തള്ളി. സംസ്ഥാന സർക്കാരിന് തുടർനടപടി സ്വീകരിക്കാമെന്ന വാദം ജസ്റ്റിസ് എൻ നഗരേഷ് അംഗീകരിക്കുകയും ചെയ്തു. കെ - റെയിലിനായി സർക്കാരിന് ഭൂമി ഏറ്റെടുക്കാനാവില്ലെന്നു കാണിച്ച് സമർപ്പിച്ച രണ്ട് ഹർജികളാണ് തള്ളിയത്.

കെ - റെയിൽ ഒരു പ്രത്യേക റെയിൽവേ പദ്ധതിയാണെന്നും കേന്ദ്ര സർക്കാരിന്റെ അനുവാദം ഇല്ലാതെ ഭൂമി ഏറ്റെടുക്കാനോ പദ്ധതി നടപ്പാക്കാനോ സംസ്ഥാന സർക്കാരിന് സാധിക്കില്ലെന്നുമായിരുന്നു ഹർജിയിൽ പറയുന്നത്. കെ - റെയിൽ സാധാരണ പദ്ധതി മാത്രമാണെന്നും പ്രത്യേക പദ്ധതിയല്ലെന്നും സർക്കാർ കോടതിയെ അറിയിച്ചിരുന്നു.

പ്രത്യേക റെയിൽവേ പദ്ധതിയല്ലാത്തതിനാൽ സ്ഥലം ഏറ്റെടുപ്പ്, പദ്ധതി നിർവഹണം എന്നിവയ്ക്ക് അധികാരമുണ്ടെന്ന് സർക്കാർ കോടതിയെ അറിയിച്ചു. ഈ വാദമാണ് കോടതി അംഗീകരിച്ചത്. കെ-റെയിൽ പ്രത്യേക റെയിൽവേ പദ്ധതിയുടെ ലിസ്റ്റിലേക്ക് വന്നുകഴിഞ്ഞാൽ ഇതുസംബന്ധിച്ച് പ്രത്യേക വിജ്ഞാപനം പുറത്തിറക്കേണ്ടതുണ്ട്.