മൊബൈൽ ഫോണിൽ റെയിഞ്ച് കിട്ടാത്ത അവസ്ഥ അനുഭവിക്കാത്ത ഒരാളും ഉണ്ടാവില്ല. വൈഫൈ ഡേറ്റയേക്കാൾ നാം ഏറ്റവും കൂടുതൽ ആശ്രയിക്കുന്നത് സെല്ലുലാർ ഡേറ്റയാണ്. വീട്ടിനുള്ളിൽ ഇരുന്ന് ഇന്റർനെറ്റ് ഉപയോഗിക്കാനോ അത്യാവശ്യമായി കോൾ ചെയ്യാനോ കഴിയാത്തത് പലർക്കും വലിയ തല വേദന സൃഷ്ടിക്കുന്ന കാര്യമാണ്. ഇനി ഇത്തരത്തിൽ നെറ്റ്‌വർക്ക് കിട്ടാതെ വരുമ്പോൾ ഈ പൊടിക്കൈകൾ ഒന്ന് പ്രയോഗിച്ചു നോക്കു. നെറ്റ്‌വർക്ക് മെച്ചപ്പെടുന്നത് കാണാം.
1. സിഗ്നൽ സ്വീകരിക്കുന്ന ആന്റിനകൾ
നെറ്റ്‌വർക്ക് ധാതാവിൽ നിന്ന് സിഗ്നലുകൾ സ്വീകരിക്കാൻ ഫോണിനുള്ളിലുള്ള ചില ആന്റിനകളുണ്ട്. ഇവ മറയ്ക്കുന്ന തരത്തിലുള്ള ഫോൺ കവറുകളാണ് (ഹാർഡ് കെയ്സുകൾ) നിങ്ങൾ ഉപയോഗിക്കുന്നതെങ്കിൽ റെയിഞ്ച് കിട്ടാൻ ബുദ്ധിമുട്ട് ഉണ്ടാകും. ഇത്തരത്തിൽ റെയിഞ്ച് കിട്ടാതെ വരുമ്പോൾ ഫോണിന്റെ കവർ ഊരി മാറ്റിയ ശേഷം ഉപയോഗിച്ചു നോക്കൂ മാറ്റം കാണാം.
2. സിഗ്നലുകളെ തടയുന്ന വസ്തുക്കൾ
ഫോണിലേക്ക് സിഗ്നലുകൾ എത്തുന്നത് തടയുന്ന വസ്തുക്കൾ നമുക്കു ചുറ്റുമുണ്ട്. അവയിലൊന്നാണ് ഇലക്ട്രോണിക് ഉപകരണങ്ങൾ. അതിനാൽ റെയിഞ്ച് കുറയുന്ന സാഹചര്യത്തിൽ ഇത്തരം ഇലക്ട്രോണിക് ഉപകരണങ്ങളുടെ അടുത്ത് നിന്ന് ദൂരേക്ക് മാറിയ ശേഷം ഫോൺ ഉപയോഗിക്കുക.
3. ബാറ്ററി ചാർജ്
ഫോണിന് നെറ്റ്‌വർക്ക് ദാതാവിൽ നിന്ന് വരുന്ന സിഗ്നലുകൾ സ്വീകരിക്കാൻ ബാറ്ററി ചാർജ് അത്യാവശ്യമാണ്. ബാറ്ററി ചാർജ് കുറഞ്ഞിരിക്കുന്ന സമയത്ത് സിഗ്നലുകളെ സ്വീകരിക്കാൻ ഫോണിനാവില്ല. അതിനാൽ ബാറ്ററി ചാർജ് 50 ശതമാനത്തിന് മുകളിൽ തന്നെ സൂക്ഷിക്കാൻ ശ്രദ്ധിക്കുക. സിഗ്നൽ കുറവാണെങ്കിൽ ഫോൺ ചാർജ് ചെയ്ത ശേഷം ഉപയോഗിക്കുക.
4. സിം കാർഡ്
സിം കാർഡിന്റെ ഏറ്റവും പ്രധാനപ്പെട്ട ഭാഗം, കോപ്പർ ചിപ്പ് പതിപ്പിച്ച ഭാഗമാണ്. അതിനാൽ തന്നെ ഈ ഭാഗം വൃത്തിയായി സൂക്ഷിക്കുക. സിം കാർഡ് പുറത്തെടുത്ത് കോപ്പർ ഭാഗം തുടച്ചു വൃത്തിയാക്കിയ ശേഷം ഉപയോഗിക്കുക.
5. എയർപ്ലെയിൻ മോഡ്
ഫോണിലേക്ക് വരുന്ന സിഗ്നലുകൾ ചില സമയങ്ങളിൽ കുറഞ്ഞു പോകാറുണ്ട്. അത്തരം സമയങ്ങളിൽ ഫോണിലെ എയർപ്ലെയിൻ മോഡ് ഓണാക്കുക. ഇത് ഓണാക്കുമ്പോൾ ഫോണിലേക്കു വരുന്ന നെറ്റ്‌വർക്ക് സിഗ്നലുകൾ, വൈ ഫൈ, ബ്ലൂ ടൂത്ത് എന്നിവ കട്ടാകും. സിഗ്നലുകൾ ഫോണിലേക്ക് വരികയോ ഫോണിൽ നിന്ന് പുറത്തേക്ക് പോവുകയോ ചെയ്യില്ല. ഇതിനു ശേഷം 30 സെക്കൻഡ് കഴിഞ്ഞ് എയർപ്ലെയിൻ മോഡ് ഓഫാക്കുക. അപ്പോൾ സിഗ്നലുകൾ ഒന്നു കൂടി ബൂസ്റ്റ് ചെയ്ത് ഫോണിലേക്ക് വരും. ഇത് റെയിഞ്ച് കൂടുതലായി ലഭിക്കാൻ സഹായിക്കും.
6. റീസ്റ്റാർട്ട് ചെയ്യൽ
ആഴ്ചയിൽ ഒരിക്കലെങ്കിലും ഫോൺ റീസ്റ്റാർട്ട് ചെയ്തില്ലെങ്കിൽ അത് ഫോണിന്റെ റെയിഞ്ചിനെ ബാധിക്കും. അതിനാൽ ഇടയ്ക്കിടെ ഫോൺ റീസ്റ്റാർട്ട് ചെയ്താൽ റെയിഞ്ച് പ്രശ്നം ഒരു പരിധി വരെ പരിഹരിക്കാനാകും.
7. വൈ ഫൈ കോളിംഗ്
വൈ ഫൈ ഉള്ളവർക്ക് ഇന്റർനെറ്റിന്റെ കാര്യത്തിൽ പ്രശ്നമുണ്ടാകില്ല. എന്നാൽ ഫോൺ കോൾ വിളിക്കാൻ നെറ്റ്‌വർക്ക് സിഗ്നൽ തന്നെ വേണം. ഇത്തരത്തിൽ സിഗ്നൽ കുറവുള്ള വൈഫൈ ലഭിക്കുന്ന സ്ഥലങ്ങളിൽ ഫോണിലെ വൈഫൈ കോളിംഗ് ഓപ്ഷൻ എനേബിൾ ചെയ്യുക. വോ വൈ ഫൈ ഫീച്ചറുള്ള ഫോണുകളിൽ ഇത്തരം സൗകര്യം ഉപയോഗിച്ച് റെയിഞ്ച് കട്ടാകാതെ തന്നെ നെറ്റ്‌വർക്കിൽ നിന്ന് ഫോൺ കോൾ ചെയ്യാനാകും.