വാട്സാപ്പിലും മെസഞ്ചറിലുമെല്ലാം ചാറ്റ് ചെയ്യുമ്പോൾ നാം സ്ഥിരം ഉപയോഗിക്കുന്ന ഒന്നാണ് സ്റ്റിക്കറുകൾ. സുഹൃത്തുക്കളുമായി സംസാരിക്കുമ്പോഴും ഗ്രൂപ്പിൽ ചാറ്റ് ചെയ്യുമ്പോഴുമൊക്കെ നമ്മുടെ സംഭാഷണങ്ങളെ രസകരമാക്കാൻ സ്റ്റിക്കറുകളും ഇമോജികളുമൊക്കെ സഹായിക്കും. സിനിമാ നടന്മാരുടെയും, പ്രശസ്തരായ വ്യക്തികളുടെയും, അനിമേഷൻ കഥാപാത്രങ്ങളുടെയുമൊക്കെ സ്റ്റിക്കറുകളാണ് നാം സ്ഥിരം ഉപയോഗിക്കുന്നത്. ഈ സ്റ്റിക്കറുകൾ ഒന്നുകിൽ മറ്റാരെങ്കിലും ഉപയോഗിക്കുന്നത് സേവ് ചെയ്‌തോ അല്ലെങ്കിൽ ഒരു തേഡ് പാർട്ടി ആപ്ലിക്കേഷൻ ഉപയോഗിച്ച് നിർമിച്ചോ ആയിരിക്കും നമ്മൾ ഉപയോഗിക്കുന്നത്.

നമ്മുടെ തന്നെ സ്വന്തം രൂപം സ്റ്റിക്കറായി ലഭിക്കണമെങ്കിലും മറ്റ് ആപ്ലിക്കേഷനുകളെ ആശ്രയിക്കേണ്ടതുണ്ട്. എന്നാൽ ഇത്തരത്തിൽ മറ്റ് ആപ്പുകളെ ഒന്നും ഉപയോഗിക്കാതെ ഒറ്റ ഫോട്ടോ കൊണ്ട് നമുക്ക് നമ്മുടെ രസകരമായ അനേകം സ്റ്റിക്കറുകൾ നിർമ്മിക്കാൻ ഒരു വഴിയുണ്ട്. ഫോണിലെ ഗൂഗിൾ കീബോഡ് മാത്രം മതിയാകും. അതിനായി നിങ്ങൾ ചെയ്യേണ്ടത് ഇത്രമാത്രം.

1. ആദ്യം ഗൂഗിൾ കീ ബോഡ് അഥവാ ജി ബോഡ് തുറക്കുക.

2. കീബോഡിന് മുകളിൽ ഇടതു വശത്തായുള്ള സ്റ്റിക്കർ ഐക്കണിൽ ക്ലിക്ക് ചെയ്യുക.

3. അപ്പോൾ സ്റ്റിക്കറുകൾ തുറക്കും, ഇതിന്റെ വലതു വശത്തുള്ള പ്ലസ് ഐക്കണിൽ ക്ലിക്ക് ചെയ്യുക.

4. ഇപ്പോൾ വരുന്ന യുവർ മിനിസ് എന്ന ഓപ്ഷന് തൊട്ടു താഴെയുള്ള ക്രിയേറ്റ് എന്ന ഭാഗത്ത് ക്ലിക്ക് ചെയ്യുക. അപ്പോൾ ക്യാമറ ഓപ്പണാകും.

5. ശേഷം ഒരു സെൽഫി എടുക്കുക. ഇപ്പോൾ ക്രിയേറ്റിംഗ് മിനീസ് എന്ന് കാണിച്ചു കൊണ്ട് നിങ്ങളുടെ സ്റ്റിക്കറുകൾ തയ്യാറാകും.

6. അതിനു ശേഷം താഴെയുള്ള ഷോ മി എന്ന ഭാഗത്ത് ക്ലിക്ക് ചെയ്യുക.

7. അപ്പോൾ നമ്മുടെ തന്നെ അനിമേറ്റഡ് രൂപത്തിലുള്ള സ്റ്റിക്കറുകൾ വരും. അതിൽ കസ്റ്റമൈസ് ഓപ്ഷനിൽ ക്ലിക്ക് ചെയ്താൽ സ്റ്റിക്കറുകളെ വീണ്ടും എഡിറ്റ് ചെയ്യാൻ സാധിക്കും.

8. ഇനി ഈ സ്റ്റിക്കറുകളെ ഏതു ചാറ്റുകളിലും ഉപയോഗിക്കാം.