ലോകമെമ്പാടുമുള്ള ആരാധകരുടെ കാത്തിരിപ്പിന് വിരാമമിട്ട് സൂപ്പർ സ്റ്റാർ വിജയ് ദേവരക്കൊണ്ടയും സംവിധായകൻ പുരി ജഗന്നാഥും 'ജെജിഎം' എന്ന തങ്ങളുടെ അടുത്ത ചിത്രത്തെ കുറിച്ച് മുംബയിൽ നടന്ന ചടങ്ങിൽ പ്രഖ്യാപിച്ചു. ആക്ഷൻ-ഡ്രാമ ചിത്രത്തിൽ വിജയ് ദേവരക്കൊണ്ട മുമ്പൊരിക്കലും കണ്ടിട്ടില്ലാത്ത രൂപത്തിലും ഭാവത്തിലുമായിരിക്കും പ്രത്യക്ഷപ്പെടുക.

ചാർമി കൗർ, വംശി പൈഡിപ്പള്ളി, പുരി ജഗന്നാഥ് എന്നിവർ ചേർന്ന് നിർമ്മിക്കുന്ന ഈ ചിത്രത്തിന്റെ രചനയും സംവിധാനവും നിർവ്വഹിക്കുന്നത് പുരി ജഗന്നാഥാണ്. ഹിന്ദി, തെലുങ്ക്, തമിഴ്, കന്നഡ, മലയാളം എന്നീ ഭാഷകളിൽ റിലീസ് ചെയ്യുന്ന ഒരു പാൻ ഇന്ത്യ ആക്ഷൻ എന്റർടെയ്നർ ചിത്രമാണ് 'ജെജിഎം'.

'ഞങ്ങളുടെ അടുത്ത പ്രോജക്ട് ജെജിഎം എന്ന ചിത്രം പ്രഖ്യാപിക്കുന്നതിൽ എനിക്ക് അതിയായ സന്തോഷമുണ്ട്. വിജയ്‌ക്കൊപ്പം വീണ്ടും സഹകരിക്കുന്നതിൽ വലിയ സന്തോഷം തോന്നുന്നു. ആക്ഷൻ എന്റർടെയ്നറായ ജെജിഎം ശക്തമായ ഒരു പുത്തൻ ആഖ്യാനമാണ്.'- എന്നാണ് തന്റെ പുതിയ ചിത്രത്തെ കുറിച്ച് സംവിധായകൻ പുരി ജഗന്നാഥ് പറഞ്ഞത്.

'ഏറ്റവും ശ്രദ്ധേയവും വെല്ലുവിളി നിറഞ്ഞതുമായ തിരക്കഥകളിലൊന്നായ 'ജെജിഎം' എന്നെ അത്യധികം ആവേശഭരിതനാക്കുന്നു. കഥ സവിശേഷതയുള്ളതാണ്. അത് എല്ലാ ഇന്ത്യക്കാരെയും സ്പർശിക്കും. പുരിയുടെ ഈ സ്വപ്ന പദ്ധതിയുടെ ഭാഗമാകാൻ കഴിഞ്ഞതിൽ ഞാൻ അഭിമാനിക്കുന്നു. ചാർമ്മിക്കും അവളുടെ ടീമിനുമൊപ്പം പ്രവർത്തിക്കാൻ കാത്തിരിക്കുകയാണ്. ജെജിഎമ്മിലെ എന്റെ കഥാപാത്രം ഞാൻ മുമ്പ് ചെയ്തിട്ടില്ലാത്തവിധം ഉന്മേഷദായകമാണ്. അത് പ്രേക്ഷകരിൽ സ്വാധീനം ചെലുത്തുമെന്ന് എനിക്ക് ഉറപ്പുണ്ട്' - എന്നാണ് നടൻ വിജയ് ദേവരക്കൊണ്ട പ്രതികരിച്ചത്.

2022 ഏപ്രിലിൽ ഷൂട്ട് ആരംഭിക്കും. ഒന്നിലധികം അന്താരാഷ്ട്ര ലൊക്കേഷനുകളിൽ ചിത്രീകരിക്കും. 'ജെജിഎം' ഒരു പുരി കണക്ട് ആന്റ് ശ്രീകര സ്റ്റുഡിയോ പ്രൊഡക്ഷനാണ്. ചാർമ്മി കൗർ, വംശി പൈഡിപ്പള്ളി പ്രൊഡ്യൂസർ ശ്രീകര സ്റ്റുഡിയോ, ശ്രീകര സ്റ്റുഡിയോയുടെ ഡയറക്ടർ സിങ്ക റാവു എന്നിവരാണ് ഇത് നിർമ്മിക്കുന്നത്.

പുരി ജഗന്നാഥ് രചനയും സംവിധാനവും നിർവ്വഹിക്കുന്ന 'ജെജിഎം' എന്ന ഈ ആക്ഷൻ എന്റർടെയ്നർ ചിത്രം 2023 ഓഗസ്റ്റ് 3ന് ലോകമെമ്പാടും റിലീസ് ചെയ്യും.പി ആർ ഒ: ശബരി