ഗർഭനിരോധനത്തിനായി പുരുഷൻമാർ പ്രധാനമായും ഉപയോഗിക്കുന്നതാണ് കോണ്ടം. സ്ത്രീകൾക്കുള്ള കോണ്ടവും വികസിപ്പിച്ചിട്ടുണ്ടെങ്കിലും കൂടുതലായി ഇവർ ഉപയോഗിക്കുന്നത് ഗർഭനിരോധന ഗുളികകളാണ്. കോണ്ടം ഉപയോഗിക്കുന്നവരിലുണ്ടാകുന്ന പാർശ്വഫലങ്ങൾ ഒഴിവാക്കുന്നതിനും ലൈംഗികബന്ധം കൂടുതൽ ആസ്വാദ്യകരമാക്കുന്നതിനും ഗർഭ നിരോധന ഗുളികകൾ ഉപയോഗിക്കുന്നതിനാണ് സ്ത്രീകൾ താത്പര്യം കാണിക്കുന്നത്.

എന്നാൽ ഹോർമോൺ അടിസ്ഥാനമാക്കിയ ഗർഭനിരോധന ഗുളികകൾ സ്ത്രീകളിൽ ശരീരഭാരം കൂടാനും ലൈംഗികതാത്പര്യം കുറയാനും കാരണമാവുന്നതായി കണ്ടെത്തിയിട്ടുണ്ട്. ഇപ്പോഴിതാ പുരുഷൻമാ‌ർക്കും ഉപയോഗിക്കാവുന്ന ഗർഭനിരോധന ഗുളികകൾ വരുന്നു എന്ന വാർത്തയാണ് പുറത്തുവരുന്നത്. യു.എസിലെ മിന്നസോട്ട സർവകലാശാലയിലെ ഗവേഷകരാണ് പുരുഷൻമാർക്കുള്ള ഗർഭനിരോധന ഗുളികകൾ വികസിപ്പിച്ചെടുത്തത്.

ശാരീരികവും മാനസികവുമായ പാർശ്വഫലങ്ങളൊന്നുമില്ലാത്ത ഗുളിക കൊണ്ട് ഗർഭസാദ്ധ്യത 99 ശതമാനം കുറയ്ക്കാൻ കഴിയുമെന്നാണ് കണ്ടെത്തൽ. പുരുഷ പ്രത്യുൽപ്പാദനത്തിൽ നിർണായകമായ വിറ്റാമിൻ എയുടെ പ്രവർത്തനങ്ങളെയാണ് ഈ ഗുളിക നിയന്ത്രിക്കുക.

പി.എച്ച്.ആർ-529 എന്ന് പേര് നൽകിയിരിക്കുന്ന ഗുളിക നാലാഴ്ച നൽകിയ ചുണ്ടെലികളിൽ ശുക്ലത്തിന്റെ അളവ് വൻതോതിൽ കുറഞ്ഞതായി കണ്ടെത്തിയിരുന്നു. അതുകൊണ്ട് തന്നെ അവയുടെ പ്രത്യൂത്‌പാദന ശേഷിയും കുറഞ്ഞതായി കണ്ടെത്തി. എന്നാൽ മരുന്നു കൊടുക്കൽ നിർത്തിയതിന് പുറമെ പ്രത്യുത്‌പാദന ശേഷി കൂടുകയും ചെയ്‌തെന്ന് ഗവേഷകർ പറയുന്നു. ചുണ്ടെലികളിൽ നടത്തിയ പരീക്ഷണം വിജയമായതിനാൽ ഈ വർഷം അവസാനത്തിന് മുമ്പ് മനുഷ്യരിലെ പരീക്ഷണം പൂർത്തിയാക്കുമെന്ന് ഗവേഷണത്തിന് നേതൃത്വം നൽകിയ ഡോ. എം.ഡി.അബ്ദുല്ല അൽ നോമൻ പറഞ്ഞു.

മനുഷ്യരിലെ പരീക്ഷണം പൂർത്തിയാവുന്നതോടെ അതിന്റെ ഫലങ്ങൾക്ക് അനുസരിച്ച് മരുന്ന് വിപണിയിൽ ഇറക്കാനാണ് ഗവേഷകർ തീരുമാനിച്ചിരിക്കുന്നത്. യുവർചോയ്സ് എന്ന കമ്പനിയിലൂടെയായിരിക്കും മരുന്ന് വിപണിയിൽ എത്തിക്കുക എന്ന് എം.ഡി.അബ്ദുല്ല അൽ നോമൻ അറിയിച്ചു. ഇതിലൂടെ ലൈംഗികജന്യ രോഗങ്ങൾ പകരുന്നത് തടയാനും സാധിക്കുമെന്നാണ് ഗവേഷകരുടെ വാദം.