തിരുവനന്തപുരം: ഇന്ധനവില ഇന്നും കൂടി. പെട്രോൾ ലിറ്ററിന് 87 പൈസയും ഡീസലിന് 84 പൈസയുമാണ് കൂടിയത്. സംസ്ഥാനത്ത് ഡീസൽ വില വീണ്ടും നൂറ് കടന്നു. കഴിഞ്ഞ വർഷം ഒക്ടോബർ പതിനൊന്നിന് ഡീസൽ വില നൂറ് രൂപ കടന്നിരുന്നു. എന്നാൽ നവംബറിൽ വില കുറഞ്ഞു.

തുടർച്ചയായ ഏഴാം ദിവസമാണ് ഇന്ധനവില കൂടുന്നത്. ഒരാഴ്ചയ്ക്കിടെ പെട്രോളിന് ഏഴ് രൂപ 98 പൈസയും ഡീസലിന് അഞ്ച് രൂപ 70 പൈസയുമാണ് വർദ്ധിച്ചത്. ഇതോടെ തിരുവനന്തപുരത്ത് ഒരു ലിറ്റർ ഡീസലിന് 100 രൂപ 14 പൈസയും പെട്രോളിന് 113 രൂപ 24 പൈസയുമായി.

കൊച്ചിയിൽ പെട്രോൾ ലിറ്ററിന് 111 രൂപ 28 പൈസയും ഡീസലിന് 98 രൂപ 29 പൈസയുമാണ് ഇന്നത്തെ വില. കോഴിക്കോട് ഒരു ലിറ്റർ പെട്രോളിന് 111 രൂപ 52 പൈസയും ഡീസലിന് 98 രൂപ 54 പൈസയുമായി. ഇന്നലെ പെട്രോളിന് 88 പൈസയും ഡീസലിന് 84 പൈസയും കൂട്ടിയിരുന്നു.