കൊച്ചി: കരിപ്പൂർ വിമാനത്താവളത്തിന് പുറത്ത് വൻ സ്വർണ വേട്ട. ദുബായിൽ നിന്ന് ശരീരത്തിൽ ഒളിപ്പിച്ച് കടത്തിയ സ്വർണ മിശ്രിതമാണ് പൊലീസ് പിടികൂടിയത്. ഒരു കിലോയോളം സ്വർണമാണ് പിടികൂടിയത്. സംഭവത്തിൽ മൂന്ന് പേരെ കസ്റ്റഡിയിലെടുത്തു.

ദുബായിൽ നിന്നെത്തിയ യാത്രക്കാരനും സ്വർണം വാങ്ങാനെത്തിയ രണ്ടുപേരുമാണ് പിടിയിലായത്. വാഴക്കാട് സ്വദേശി മുഹമ്മദ് റമീസ്, മുഹമ്മദ് മുസ്തഫ, ഉവൈസ് സൈനുബ്‌ദ്ദീൻ എന്നിവരെയാണ് പൊലീസ് പിടികൂടിയത്.

പുലർച്ചെ വന്ന വിമാനത്തിലാണ് മുഹമ്മദ് റമീസ് സ്വർണം കൊണ്ടുവന്നത്. മറ്റ് രണ്ട് പേരും സ്വർണം വാങ്ങാനെത്തിയവരാണ്. കസ്റ്റംസ് പരിശോധന കഴിഞ്ഞ് പുറത്തേക്കിറങ്ങിയപ്പോൾ പൊലീസാണ് ഇവരെ പിടികൂടിയത്. ഇവർ സഞ്ചരിച്ച വാഹനവും കസ്റ്റഡിയിലെടുത്തു.