മലപ്പുറം: മുസ്‌ലിം ലീഗ് സംസ്ഥാന പ്രസിഡന്റ് പാണക്കാട് ഹൈദരലി ശിഹാബ് തങ്ങളുടെ വിയോഗത്തോടെ നിലവിലെ ജില്ലാ പ്രസിഡന്റ് സാദിഖലി ശിഹാബ് തങ്ങൾ സംസ്ഥാന പ്രസിഡന്റായേക്കും. ഹൈദരലി തങ്ങളുടെ അനാരോഗ്യത്തെ തുടർന്ന് കുറച്ചുനാളുകളായി സംസ്ഥാന പ്രസിഡന്റിന്റെ ചുമതല വഹിക്കുന്നത് സാദിഖലി തങ്ങളാണ്.

ഹൈദരലി തങ്ങളുടെ അനുജനും പാണക്കാട്ടെ കുടുംബത്തിലെ മുതിർന്ന അംഗവുമാണ് 55കാരനായ സാദിഖലി. 2009 മുതൽ മലപ്പുറം ജില്ലാ പ്രസിഡന്റിന്റെ സ്ഥാനം വഹിക്കുന്നുണ്ട്. 2000 മുതൽ 2007 വരെ യൂത്ത് ലീഗിന്റെ സംസ്ഥാന പ്രസിഡന്റായിരുന്നു. 15 വർഷക്കാലം സമസ്ത കേരള സുന്നി സ്റ്റുഡന്റ്സ് ഫെ‌ഡറേഷൻ(എസ്.കെ.എസ്.എസ്.എഫ്)​ സംസ്ഥാന പ്രസിഡന്റുമായിരുന്നു. പാണക്കാട്ടെ കുടുംബാംഗങ്ങളിൽ ചിലർ സംസ്ഥാന പ്രസിഡന്റ് സ്ഥാനത്തേക്ക് താത്പര്യപ്പെടുന്നുണ്ടെങ്കിലും സാദിഖലി തങ്ങൾ തന്നെ പ്രസിഡന്റാവാനാണ് സാദ്ധ്യത. പരസ്യ ഭിന്നതയിലേക്ക് കാര്യങ്ങളെത്തില്ല.

വഖഫ് ബോർഡ് നിയമനം പി.എസ്.സിക്ക് വിടുന്നതിനെതിരെ മുസ്‌ലിം ലീഗ് കോഴിക്കോട് സംഘടിപ്പിച്ച വൻറാലി പരോക്ഷത്തിൽ സാദിഖലി തങ്ങളിലേക്കുള്ള അധികാര കൈമാറ്റം കൂടിയായി മാറി. റാലിയുടെ ഉദ്ഘാടകൻ സാദിഖലി തങ്ങളായിരുന്നു. അരനൂറ്റാണ്ടോളമായി മുസ്‌ലിം ലീഗിന്റെ നേതൃപദവിയിൽ പാണക്കാട് കുടുംബമാണുള്ളത്. ലീഗിന്റെ അടിയന്തര സെക്രട്ടറിയേറ്റ് യോഗം ചേർന്ന് സാദിഖലി തങ്ങളെ പ്രസിഡന്റ് സ്ഥാനത്തേക്ക് നിർദ്ദേശിക്കും. പിന്നീട് സംസ്ഥാന പ്രവർത്തക സമിതിയും കൗൺസിലും ചേർന്ന് ഇതിന് അംഗീകാരമേകും.