തിരൂർ: തീരദേശം കേന്ദ്രീകരിച്ച് മയക്കുമരുന്ന് വിൽപന നടത്തുന്ന സംഘത്തിലെ പ്രധാന കണ്ണി അറസ്റ്റിൽ. പറവണ്ണ സ്വദേശി പള്ളിപറമ്പിൽ ഷെഫീഖിനെ(29) എം.ഡി.എം.എയുമായി തിരൂർ പൊലീസ് പിടികൂടി. തിങ്കളാഴ്ച രാത്രിയിൽ പറവണ്ണയിൽ വച്ചാണ് 1.2 ഗ്രാം എം.ഡി.എം.എയുമായി തിരൂർ എസ്.എച്ച്.ഒ. ജിജോയുടെ നേതൃത്വത്തിൽ എസ്.ഐ ജലീൽ കറുത്തേടത്തും സംഘവും പ്രതിയെ പിടികൂടിയത്. സിവിൽ പോലീസ് ഓഫീസർമാരായ ഉണ്ണിക്കുട്ടൻ, ഷെറിൻ ജോൺ, ധനേഷ്, അജിത്ത് എന്നിവരും സംഘത്തിലുണ്ടായിരുന്നു. പ്രതിയെ തിരൂർ കോടതി റിമാൻഡ് ചെയ്തു മഞ്ചേരി സബ് ജയിലിൽ അയച്ചു. തീരദേശങ്ങളിൽ മയക്കുമരുന്ന് കടത്തും വിൽപനയും ഉപയോഗവും നടത്തുന്നവരെ നിരീക്ഷിച്ച് കൂടുതൽ ശക്തമായ നടപടികൾ മയക്കുമരുന്ന് മാഫിയകൾക്ക് എതിരെ വരും ദിവസങ്ങളിലും ഉണ്ടാകുമെന്ന് പൊലിസ് അറിയിച്ചു.