പ്രമാടം: പ്രമാടം ഗവ.എൽ.പി സ്‌കൂളിന് പുതിയ കെട്ടിടം നിർമ്മിക്കുന്നതിനായി ഒരു കോടി രൂപ അനുവദിച്ചതായി അഡ്വ .കെ.യു ജനീഷ് കുമാർ എം.എൽ.എ അറിയിച്ചു. സ്‌കൂളിന്റെ ഭൗതിക സാഹചര്യം മെച്ചപ്പെടുത്തണമെന്നു കാട്ടി മന്ത്രി വി. ശിവൻ കുട്ടിയ്ക്ക് കത്ത് നല്കിയിരുന്നു. ഇതേ തുടർന്നാണ് ഒരു കോടി രൂപ അനുവദിച്ചത്. രണ്ട് നിലകളുള്ള കെട്ടിടമാണ് നിർമ്മിക്കുന്നത്. ഓരോ നിലയിലും നാലു ക്ലാസ് റൂമുകളുണ്ടാകും. കൂടാതെ ഓഫീസ് മുറി, ടൊയ്‌ല​റ്റ് തുടങ്ങിയവയും നിർമ്മിക്കും.സ്കൂളിന് 106 വർഷം പഴക്കമുണ്ട്.1915ലാണ് സ്‌കൂൾ സ്ഥാപിതമായത്. ഒന്നാം ക്ലാസ് മുതൽ നാലാം ക്ലാസ് വരെ 240 വിദ്യാർത്ഥികളും പ്രീ പ്രൈമറി വിഭാഗത്തിൽ 110 വിദ്യാർത്ഥികളുമാണ് ഇപ്പോൾ ഇവിടെ പഠനം നടത്തുന്നത്. പ്രമാടം പഞ്ചായത്തിൽ ഏ​റ്റവും കൂടുതൽ കുട്ടികൾ പഠിക്കുന്ന ഈ വിദ്യാലയം പാഠ്യപാഠ്യേതര വിഷയങ്ങളിൽ മികവുപുലർത്തുന്ന സ്ഥാപനമാണെന്നും എം.എൽ.എ പറഞ്ഞു.പുതിയ കെട്ടിട നിർമ്മാണം പൂർത്തിയാകുന്നതോടെ കുട്ടികൾക്ക് കൂടുതൽ പഠന സൗകര്യം ലഭ്യമാകും. തദ്ദേശസ്വയം ഭരണ വകുപ്പിനാണ് നിർമ്മാണ ചുമതല നല്കിയിട്ടുള്ളത്.