തിരുവല്ല: കാവുംഭാഗം കരുനാട്ടുകാവ് ഇസ്കോൺ ശ്രീകൃഷ്ണസ്വാമി ക്ഷേത്രത്തിലെ തിരുവുത്സവത്തിന്റെ ഭാഗമായുള്ള ശുദ്ധികലശം തുടങ്ങി. ഇന്നലെ വൈകിട്ട് 6.30നു ദീപാരാധനയ്ക്കുശേഷം ശുദ്ധിക്രിയകളുടെ ഭാഗമായുള്ള പ്രാസാദ ശുദ്ധി ക്രിയാചടങ്ങുകളും തുടർന്ന് അത്താഴ പൂജയും നടന്നു. ഇന്ന് രാവിലെ ഉഷപൂജയ്ക്കുശേഷം ബിംബ ശുദ്ധിക്രിയകളും കലശാഭിഷേകത്തോട് കൂടി ഉച്ചപൂജയും നടക്കും. തുടർന്ന് അവസ്രാവ പ്രോക്ഷണം. ചടങ്ങുകൾക്ക് ക്ഷേത്രം തന്ത്രിയും മേൽശാന്തിയും മുഖ്യകാർമ്മികത്വം വഹിക്കും. അന്താരാഷ്‌ട്ര ശ്രീകൃഷ്ണ അവബോധ സംഘടനാ (ഇസ്കോൺ) കേരളാ ഘടകം പ്രസിഡന്റ് ഡോ. സ്വാമി ജഗത് സാക്ഷി ദാസ്, കരുനാട്ടുകാവ് ക്ഷേത്രം കാര്യദർശി സ്വാമി പേശല ഗോപാൽ ദാസ്, കരുനാട്ടുകാവ് ശ്രീകൃഷ്ണസ്വാമി ബ്രാഹ്മണ സമൂഹം ട്രസ്റ്റ് പ്രസിഡന്റ് രാജഗോപാൽ ശ്രീ കൃഷ്ണ നിവാസ്, സെക്രട്ടറി ശിവകുമാർ ആർ. ചൊക്കംമഠം എന്നിവർ ചടങ്ങുകൾക്ക് നേതൃത്വം വഹിക്കും.