പന്തളം: കുരമ്പാല -പൂഴിക്കാട് -വലക്കടവ്-മുട്ടാർറോഡ് തകർന്നതുമൂലം യാത്രദുരിതം. വർഷങ്ങളായി തകർന്നുകിടക്കുന്ന റോഡിന്റെ നവീകരണത്തിന് കഴിഞ്ഞ ബഡ്ജറ്റിൽ 5 കോടി രൂപ അനുവദിച്ചിട്ടുണ്ട്.

എം.സി റോഡിൽ കുരമ്പാല ആലുംമൂട്ടിൽ ജംഗ്ഷനിൽ ആരംഭിച്ച് തവളംകുളം, പൂഴിക്കാട് സ്‌കൂൾ ജംഗ്ഷൻ ,വലക്കടവ് വഴി പന്തളം- മാവേലിക്കര റോഡിൽ മുട്ടാർ ജംഗ്ഷനിൽ എത്തുന്നതാണ് റോഡ്.

7 വർഷം മുമ്പ് 2 കോടി രുപ ചെലവിൽ പുനരുദ്ധാരണം നടത്തിയെങ്കിലും ഉദ്ഘാടനത്തിനു മുമ്പുതന്നെ റോഡിന്റെ പല ഭാഗങ്ങളും തകർന്നു.

നിർമ്മാണം നടത്തിയപ്പോൾ ഓടകൾ വേണ്ടിടത്ത് അവ നിർമ്മിച്ചിരുന്നില്ല. മഴക്കാലത്ത് വെള്ളം കെട്ടിക്കിടക്കുന്ന ഭാഗങ്ങളിൽ റോഡിന്റെ ഉപരിതലം ഉയർത്തിയതുമില്ല. ഉണ്ടായിരുന്ന ഓടയും കലുങ്കുകളും നികത്തി റോഡ് നിർമ്മിച്ചതാണ് വേഗത്തിൽ തകരാൻ കാരണമായത്. വയറപ്പുഴ പാലം നിർമ്മിച്ചുകഴിഞ്ഞാൽ എം.സി റോഡിന് സമാന്തരമായി ബൈപാസായി മാറ്റാൻ കഴിയുന്നതാണ് റോഡ് .കുരമ്പാലയിൽ ആരംഭിച്ച് പൂഴിക്കാട്- വയറപ്പുഴ ഞെട്ടൂരിലൂടെ എം .സി റോഡിൽ മാന്തുകയിലെത്താൻ കഴിയും.അതോടെ പന്തളം ജംഗ്ഷനിലെ ഗതാഗതക്കുരുക്കിന് ഒരുപരിധി വരെ പരിഹാരമാകും.

കുടശനാട്‌ മേഖലയിലുള്ളവർക്ക് കുരമ്പാല ,അടൂർ ,തട്ട ഭാഗങ്ങളിലേക്ക് യാത്ര ചെയ്യുന്നതിനുള്ളള എളുപ്പവഴി കൂടിയാണിത്. ഇരുചക്രവാഹനയാത്രക്കാർ കുഴികളിൽ വീണ് അപകടം ഉണ്ടാകുന്നത് പതിവാണ്. ഓട്ടോറിക്ഷ ഇൗ റോഡിലൂടെ വരാറില്ല.

റോഡ് തകർന്നുകിടക്കുന്നതിനാൽ കായംകുളം മേഖലകളിലേക്കും മറ്റും പോകുന്നതിന്ന് തവളംകുളം നിവാസികൾ എം.സി റേഡിലെത്തി എം.എം ജംഗ്ഷൻ പൂഴിക്കാട് വഴി കിലോമിറ്ററുകൾ അധികം യാത്ര ചെയ്താണ് പോകുന്നത് .

--------------------

റോഡിന്റെ പുനർനിർമ്മാണത്തിന് 5 കോടി രൂപ അനുവദിച്ചിട്ടുണ്ട്. ടെൻഡർ നടപടികൾ ഉടനുണ്ടാകും. കുരമ്പാലയിൽ തുടങ്ങി പൂഴിക്കാട്, വലക്കടവ് വഴി എം സി .റോഡിൽ മണികണ്ഠൻ ആൽത്തറയിൽ വരെയാണ് പുനർനിർമ്മാണം.

ചിറ്റയം ഗോപകുമാർ

ഡെപ്യൂട്ടി സ്പീക്കർ

-------------

ബഡ്ജറ്റിൽ അനുവദിച്ച 5 കോടിക്ക് സാങ്കേതിക അനുമതിക്കായി എസ്റ്റിമേറ്റ് തയ്യാറാക്കി സമർപ്പിച്ചിട്ടുണ്ട്

എം .ആർ.മനു കുമാർ

അസിസ്റ്റന്റ് എൻജിനീയർ പി.ഡബ്ല്യു.ഡി പന്തളം