കൊല്ലം: ഓട്ടോറിക്ഷയുടെ സി.സി മുടങ്ങിയതിന് ഡ്രൈവറെ ആക്രമിച്ച് വാഹനം തട്ടിയെടുത്ത സംഘത്തിലെ ഒരാൾ പാരിപ്പളളി പൊലീസിന്റെ പിടിയിലായി. കല്ലമ്പലം പുല്ലൂർമുക്ക് സുനിൽ നിവാസിൽ റീബുവാണ് (40) പിടിയിലായത്.

18ന് പാരിപ്പളളി മെഡിക്കൽ കോളേജിന് സമീപത്തെ സ്റ്റാൻഡിൽ നിന്ന് ഓട്ടം വിളിച്ച് കൊണ്ടുപോയ ആട്ടോയാണ് തട്ടിക്കൊണ്ട് പോയത്. കല്ലമ്പലത്തെ സ്വകാര്യ ധനകാര്യ സ്ഥാപനത്തിൽ നിന്ന് പണം കടമെടുത്ത് വാങ്ങിയ ഓട്ടോയുടെ തവണ മുടങ്ങിയതിനെ തുടർന്നാണ് പ്രതിയുൾപ്പെട്ട സംഘം വാഹനം തട്ടിയെടുത്തത്. ഓട്ടോയിൽ കയറി മൈലാടുംപാറയിലെത്തിയപ്പോൾ ഡ്രൈവറെ ആക്രമിച്ച് തട്ടിയെടുക്കുകയായിരുന്നു. തുടർന്ന് ഓട്ടോ ഡ്രൈവറുടെ പരാതിയിൽ പാരിപ്പളളി പൊലീസ് കവർച്ചയ്ക്ക് കേസെടുത്തു. റീബുവിനെ കല്ലമ്പലത്ത് നിന്നാണ് പിടികൂടിയത്. സമീപത്തെ ക്ഷേത്രത്തിന് പുറകിൽ ഒളിപ്പിച്ച ഓട്ടോയും പൊലീസ് പിടിച്ചെടുത്തു.