പരവൂർ: പരവൂർ ജംഗ്​ഷനിൽ സ്വകാര്യ ബസിൽ നിന്നു റോഡിലേക്ക് തെറിച്ചു വീണ് ഒൻപതാം ക്ലാസുകാരിക്കു പരി​ക്കേ​റ്റു. കോട്ടപ്പുറം കണിച്ചേ​റ്റിൽ വീട്ടിൽ മനുജയ്ക്കാണ് (15) പരി​ക്കേ​റ്റത്. കുട്ടിയെ ഉടൻ പാലത്തറ എൻ.എസ് സഹകരണ ആശുപത്രി​യിൽ പ്രവേശിപ്പിച്ചു.

ഇന്നലെ രാവിലെ 7 മണിയോടെയാണ് സംഭവം. തെക്കു ഭാഗത്ത് നിന്നു വരി​കയായിരുന്ന ബിസ്മില്ല എന്ന ബസിൽ നിന്നാണ് കുട്ടി തെറി​ച്ചു വീണത്. നിറയെ ആളുകളുമായി അമിതവേഗത്തിലാണ് ബസ് വന്നതെന്ന് ദൃക്‌സാക്ഷികൾ പറയുന്നു. ബസ് സ്​റ്റാൻഡിൽ കയറാതെ ജംഗ്ഷനിലെ റൗണ്ട് തിരിഞ്ഞു വരുമ്പോഴാണ് കുട്ടി റോഡിലേക്കു തെറിച്ചു വീണത്. ബസിന്റെ വാതിൽ തുറന്നിരിക്കുകയായിരുന്നു. സ്വകാര്യ ബസുകൾ ബസ് സ്​റ്റാൻഡിൽ കയറാതെ പോകുന്നത് പതിവാണെന്ന് നാട്ടുകാർ പറയുന്നു. സ്വകാര്യ ബസുകൾ ബസ് സ്​റ്റാൻഡിൽ കയറാതെ മടങ്ങുന്നത് മൂലം യാത്രക്കാരും ഏറെ ബുദ്ധിമുട്ടുന്നുണ്ട്. കഴിഞ്ഞ ദിവസം പരവൂർ പൊലീസിൽ ഇതു സംബന്ധി​ച്ച് പരാതി നൽകിയിരുന്നു. സംഭവത്തിനു ശേഷം ബസ് ജീവനക്കാരെ നാട്ടുകാർ തടഞ്ഞു വയ്ക്കുകയും പൊലീസിനു കൈമാറുകയും ചെയ്തു. പരവൂർ പൊലീസെത്തി ബസ് ഡ്രൈവറെയും ബസും കസ്​റ്റഡിയിൽ എടുത്തു. പരവൂർ പൊലീസ് കേസെടുത്ത് അന്വേഷണം ആരംഭിച്ചു. ബസ് ഡ്രൈവറുടെ ലൈസൻസ് സസ്പെൻഡ് ചെയ്യാനുള്ള നടപടികൾ ആരംഭിച്ചതായി മോട്ടോർ വാഹന വകുപ്പ് ഉദ്യോഗസ്ഥർ അറിയിച്ചു.