കൊല്ലം: കടലിൽ മത്സ്യത്തൊഴിലാളികൾ അപകടങ്ങളിൽപ്പെടുന്ന സാഹചര്യങ്ങളിലെ രക്ഷാപ്രവർത്തന മോക്ഡ്രിൽ നടത്തി. കൊല്ലം സി​റ്റി പൊലീസ്,​ ജില്ലാ ആരോഗ്യ വകുപ്പ്, ഫയർ ആൻഡ് റസ്‌ക്യൂ സർവീസ്, ഫിഷറീസ് വകുപ്പ്, കടലോര ജാഗ്രതാ സമിതി എന്നിവർ സംയുക്തമായാണ് തീരദേശത്ത് മോക്ഡ്രിൽ നടത്തിയത്.

കൊല്ലം തീരത്ത് നിന്നും 6 നോട്ടിക്കൽ മൈൽ പടിഞ്ഞാറ് കടലിൽ അപകടത്തിൽപ്പെട്ട വള്ളത്തിൽ നിന്ന് കടലിലേക്ക് തെറിച്ചുവീണ മത്സ്യത്തൊഴിലാളികളെ കോസ്​റ്റൽ പൊലീസ് ഇന്റർസെപ്ടർ ബോട്ടായ യോദ്ധ രക്ഷപ്പെടുത്തി പ്രഥമശുശ്രൂഷ നൽകി കരയിലെത്തിച്ച് വൈദ്യസഹായം ലഭ്യമാക്കി. അപകടത്തിൽപ്പെട്ട വള്ളം ഫിഷറീസ് ബോട്ട് കെട്ടിവലിച്ച് കരയിലെത്തിച്ചു. അഗ്നിരക്ഷാസേന, ആരോഗ്യ വകുപ്പ് എന്നിവർ കരയിൽ അടിയന്തര വൈദ്യസഹായം ലഭ്യമാക്കി. നീണ്ടകരയ്ക്ക് പടിഞ്ഞാറ് 5 നോട്ടിക്കൽ മൈൽ അകലെ ഹൃദയാഘാതം സംഭവിച്ച മത്സ്യത്തൊഴിലാളിയെ നീണ്ടകര കോസ്​റ്റൽ പൊലീസ് ദർശനാ ബോട്ടിൽ ശക്തികുളങ്ങര ഹാർബറിലെത്തിക്കുന്നതും നീണ്ടകര താലൂക്ക് ആശുപത്രിയിലെത്തിച്ച് അടിയന്തര ചികിത്സ ലഭ്യമാക്കുന്നതും ഇതോടൊപ്പം നടത്തി.

സി​റ്റി പൊലീസ് കമ്മിഷണർ ​ടി. നാരായണൻ, അഡീ. എസ്.പി ജോസി ചെറിയാൻ, എ.സി.പിമാരായ ജി.ഡി. വിജയകുമാർ, എ. പ്രതീപ് കുമാർ, ഇൻസ്‌പെക്ടർമാരായ ബിജു, ഫയാസ്, ആർ. രാജേഷ്, എസ്.എസ്. ബൈജു, എസ്.ഐമാരായ സ്​റ്റെപ്‌​റ്റോ ജോൺ, ആർ.ആർ. രാഹുൽ, എം.സി. പ്രശാന്തൻ, ബാബുജി, എം.ജി. അനിൽ, സൻജയൻ, എസ്. മധു, അശോകൻ, ആർ.എം.ഒ. ഡോ. അനുരൂപ്, ഡോ. നോയൽ, കോസ്​റ്റൽ വാർഡൻമാർ, ബോട്ട് സ്​റ്റാഫുകൾ എന്നിവർ മോക്ഡ്രില്ലിൽ പങ്കെടുത്തു. തുടർന്ന് രക്ഷാപ്രവർത്തനത്തെക്കുറിച്ച് അഡീ. എസ്.പി ജോസി ചെറിയാൻ മത്സ്യത്തൊഴിലാളികൾക്ക് ബോധവത്കരണ ക്ലാസ് നടത്തി.