കൊല്ലം: മൺറോത്തുരുത്തുകാർക്ക് ഇരുകരകളിലും എത്താനുള്ള പെരുമൺ- പേഴുംതുരുത്ത് ജങ്കാറിലെ ബോട്ടുകളുടെ പരി​ശോധന അനന്തമായി നീട്ടി​ തുറമുഖ വകുപ്പ്. രണ്ട് ബോട്ടുകളുമായി ഉടമസ്ഥൻ തുറമുഖ വകുപ്പ് ഉദ്യോഗസ്ഥർക്ക് പിന്നാലെ നടക്കുകയാണ്.

തോപ്പിൽക്കടവിലുള്ള സ്വകാര്യ ബോട്ട് യാർഡിന് മാത്രമാണ് ജില്ലയിൽ തുറമുഖ വകുപ്പിന്റെ അംഗീകാരമുള്ളത്. ഇവിടെയാണ് ബോട്ടുകളുടെ സുരക്ഷിതത്വം ഉറപ്പാക്കാനുള്ള ടെസ്റ്റ് നടത്തേണ്ടത്. ഈ യാർഡിൽ നിരവധി ബോട്ടുകൾ അറ്റകുറ്റപ്പണിക്കായി​ എത്താറുണ്ട്. അതുകൊണ്ട് യാർഡിൽ ബോട്ട് പ്രവേശിപ്പിക്കാൻ തന്നെ മത്സരമാണ്. യാർഡ് ഒഴിവുള്ളപ്പോഴാവട്ടെ, ടെസ്റ്റ് നടത്തേണ്ട ആലപ്പുഴയിലെ സർവേയർക്ക് സമയവും കാണി​ല്ല! കഴിഞ്ഞ ദിവസം തൊട്ടടുത്തുള്ള മറ്റൊരു സ്വകാര്യ യാർഡിൽ ബോട്ടുകൾ കയറ്റിയെങ്കിലും സർവേയർ ടെസ്റ്റ് നടത്താൻ തയ്യാറായില്ല.

ഈമാസം എട്ടി​നാണ് ബോട്ടുകളുടെ ഫി​റ്റ്നസ് പരി​ശോധനയ്ക്കായി​ ജങ്കാർ സർവീസ് നിറുത്തിവച്ചത്. തൊട്ടടുത്ത ദിവസംതന്നെ ബോട്ടുകളുടെ അറ്റകുറ്റപ്പണി പൂർത്തിയാക്കി ടെസ്റ്റിനായി തുറമുഖ വകുപ്പ് ഓഫീസി​നെ ഉടമസ്ഥൻ സമീപി​ച്ചെങ്കി​ലും ഗൗനി​ച്ചി​ല്ല. വാഹനങ്ങളെയും യാത്രക്കാരെയും കയറ്റാനുള്ള ജങ്കാറിന്റെ തട്ട് ഇളക്കി മാറ്റിയിരിക്കുകയാണ് നി​ലവി​ൽ. ബോട്ടുകളുടെ ടെസ്റ്റ് കഴിഞ്ഞാലും ഇവ ഘടിപ്പിക്കാൻ രണ്ട് ദിവസമെടുക്കും.

 ചുറ്റണം 25 കിലോമീറ്റർ

പാസഞ്ചർ സർവീസ് ഇല്ലാത്തതിനാൽ നേരത്തെ ട്രെയിനിനെ ആശ്രയിച്ചിരുന്നവരും കൊവിഡിന് ശേഷം ജങ്കാറിലാണ് ലക്ഷ്യസ്ഥാനങ്ങളിൽ എത്തി​യി​രുന്നത്. ജങ്കാർ മുടങ്ങിയതോടെ ഭൂരി​ഭാഗം പേരും 25 കിലോമീറ്റോളം ചുറ്റിക്കറങ്ങിയാണ് കൊല്ലം നഗരത്തിൽ എത്തുന്നത്. മൺറോതുരുത്ത് ചിറ്റുമല റോഡിന്റെ നിർമ്മാണം നടക്കുന്നത് ഈ യാത്രയും ദുസ്സഹമാക്കുന്നു.