കൊല്ലം: സംസ്ഥാന തൊഴിൽ വകുപ്പിനു കീഴിൽ കൊല്ലം ചവറയിൽ പ്രവർത്തിക്കുന്ന ഇന്ത്യൻ ഇൻസ്റ്റിറ്റ്യൂട്ട് ഒഫ് ഇൻഫ്രാസ്ട്രക്ചർ ആൻഡ് കൺസ്ട്രക്‌ഷൻ (ഐ.ഐ.ഐ.സി) വിവിധ കോഴ്സുകളിലേക്ക് അപേക്ഷ ക്ഷണിച്ചു. ഇന്നു മുതൽ ഓൺലൈനായി അപേക്ഷകൾ സ്വീകരിച്ചു തുടങ്ങും. ഏപ്രിൽ 30 ആണ് അവസാന തീയതി.

മറ്റു ജില്ലകളിൽ നിന്നുള്ള അപേക്ഷകർക്ക് കാമ്പസിൽ ഹോസ്റ്റൽ, ക്യാന്റീൻ സൗകര്യങ്ങളുണ്ട്. വൈദ്യുതി ബോർഡിന്റെ വയർമാൻ ലൈസൻസിന് അപേക്ഷിക്കാൻ അർഹത നൽകുന്ന അസിസ്റ്റന്റ് ഇലക്ട്രീഷ്യൻ ലെവൽ 3, കൺസ്ട്രക്‌ഷൻ ലബോറട്ടറി ആൻഡ് ഫീൽഡ് ടെക്‌നിഷ്യൻ ലെവൽ 4 കോഴ്സുകൾക്ക് പത്താം ക്ലാസ് യോഗ്യതയുള്ളവർക്ക് അപേക്ഷിക്കാം. അപേക്ഷകർ 18 വയസ് പൂർത്തീകരിച്ചവർ ആയിരിക്കണം. ഉയർന്ന പ്രായപരിധി ഇല്ല. ബി ടെക് സിവിൽ, ഡിപ്ലോമ സിവിൽ, സയൻസ് ബിരുദം, ബിഎ ജ്യോഗ്രഫി എന്നീ യോഗ്യതയുള്ളവർക്ക് ചേരാവുന്നതാണ് അഡ്വാൻസ്ഡ് സർട്ടിഫിക്കറ്റ് പ്രോഗ്രാം ഇൻ ജി.ഐ.എസ് / ജി.പി.എസ്.

മുൻ‌വർഷങ്ങളിൽ വിജയിച്ച മുഴുവൻ വിദ്യാർത്ഥികൾക്കും ജോലി ലഭിച്ച പരിശീലന പരിപാടിയാണ് ആറുമാസം ദൈർഘ്യമുള്ള അഡ്വാൻസ്ഡ് സർട്ടിഫിക്കറ്റ് കോഴ്സ്. പശ്ചാത്തലസൗകര്യ വികസനം, നഗരവികസനം, കാലാവസ്ഥാപഠനം, ദുരന്തനിവാരണം എന്നിങ്ങനെ വിവിധ മേഖലകളിൽ ഉപയോഗിക്കുന്ന ജി.ഐ.എസ് തൊഴിലിടങ്ങളിൽനിന്നു നേരിട്ടു പഠിക്കാൻ അവസരമൊരുക്കിക്കൊണ്ടാണ് ക്രമീകരിച്ചിട്ടുള്ളത്.

ലൈസൻസില്ലാതെ വയറിംഗ് ചെയ്യുന്നത് നിയമ വിരുദ്ധമായതിനാൽ അത്തരക്കാർക്കെതിരെ ഇലക്ട്രിക്കൽ ഇൻസ്പക്ടറേറ്റ് കർശനനടപടി തുടങ്ങിയിട്ടുണ്ട്. പ്രസ്തുത സാഹചര്യത്തിൽ ഐ.ഐ.ഐ.സി.യിലെ അഞ്ചു മാസം മാത്രം ദൈർഘ്യമുള്ള അസിസ്റ്റന്റ് ഇലക്ട്രിഷ്യൻ ലെവൽ 3 പരിശീലന പരിപാടി വിജയകരമായി പൂർത്തീകരിക്കുന്നവർക്ക് വയർമാൻ ലൈസൻസിന് അപേക്ഷിക്കാനാവും. കേരളത്തിൽ ആദ്യമായാണ് ഇങ്ങനൊരു കോഴ്സ്. ഇത് സംബന്ധിച്ച സർക്കാർ വിജ്ഞാപനം 2021 ഡിസംബറി​ലാണ് ഇറങ്ങി​യത്. 30 സീറ്റാണ് ആദ്യഘട്ടത്തിൽ ഉള്ളത്.
നിർമാണവസ്തുക്കളുടെ ഗുണനിലവാരം പരിശോധിക്കാൻ പഠിപ്പിക്കുന്ന കൺസ്ട്രക്‌ഷൻ ലബോറട്ടറി ആൻഡ് ഫീൽഡ് ടെക്‌നിഷ്യൻ ലെവൽ 4 കോഴ്സി​ന് വിദേശത്തും സ്വദേശത്തും നിരവധി തൊഴിലവസരങ്ങൾ ഉള്ളതാണ്. ഐ.ഐ.ഐ.സിയിലെ ടെക്‌നിഷ്യൻ പരിശീലന പരിപാടികളെല്ലാം ദേശീയ നൈപുണ്യ വികസന കോർപറേഷൻ അംഗീകാരത്തോടെയുള്ള ദേശീയ നൈപുണ്യ യോഗ്യതാ ചട്ടക്കൂട് പ്രകാരമുള്ളതാണ്. അപേക്ഷി​ക്കാനുള്ള വെബ്സൈറ്: www.iiic.ac.in . ഫോൺ​: 8078980000