കുന്നത്തൂർ : കൊല്ലം ജില്ലയിലെ മികച്ച യൂത്ത് ക്ലബിനുള്ള സംസ്ഥാന യുവജനക്ഷേമ ബോർഡിന്റെ പുരസ്കാരം പോരുവഴി സത്യചിത്ര ഗ്രാമീണ ഗ്രന്ഥശാല ആൻഡ് യൂത്ത് ക്ലബിന്. 30,000 രൂപയും പ്രശസ്തി പത്രവും ശിൽപ്പവും അടങ്ങുന്നതാണ് പുരസ്കാരം. ഇന്ന് തിരുവനന്തപുരം സെൻട്രൽ സ്റ്റേഡിയത്തിൽ നടക്കുന്ന ചടങ്ങിൽ മന്ത്രി സജി ചെറിയാൻ വിതരണം ചെയ്യും.

ജില്ലാ കളക്ടർ ചെയർമാനായ സമിതി 2020 ജനുവരി മുതൽ ഡിസംബർവരെ ജില്ലയിലെ യൂത്ത് ക്ലബുകളുടെ പ്രവർത്തനങ്ങൾ വിലയിരുത്തിയാണ് പുരസ്ക്കാരം. ഈ വർഷത്തെ നെഹ്റു യുവകേന്ദ്ര അവാർഡും സത്യചിത്ര ലഭിച്ചിരുന്നു. കഴിഞ്ഞ ഒരു വർഷത്തിനിടെ സത്യചിത്ര നടത്തിയ കലാകായിക ,വിദ്യാഭ്യാസ , സാംസ്കാരിക, ആരോഗ്യ മേഖലകളിലെ പ്രവർത്തനങ്ങൾ, ജീവകാരുണ്യ ഇടപെടൽ, കാർഷിക ഗ്രാമ വികസന ഇടപെടലുകൾ, യുവതീ-യുവാക്കളുടെ ഉന്നമനം ലക്ഷ്യമാക്കിയുള്ള വിവിധ തൊഴിൽ പരിശീലനങ്ങൾ, സ്ത്രീ ശാക്തികരണം , കൂടുംബ കൂട്ടായ്മ പ്രവർത്തനങ്ങൾ , ദേശീയോദ്ഗ്രഥനം മുൻ നിറുത്തിയുള്ള കൂട്ടായ്മകൾ, രക്ത ദാനസേനയുടെ രൂപീകരണവും പ്രവർത്തനവും, പ്രളയകാലത്തെ ദുരിതാശ്വസ പ്രവർത്തനങ്ങൾ , കൊവിഡ് പ്രതിരോധ പ്രവർത്തനങ്ങൾ, വിശപ്പ് രഹിത ഗ്രാമം തുടങ്ങിയവയാണ് അവാർഡിന് അർഹമാക്കിയത്. 1993, 2007, 2011 വർഷങ്ങളിൽ ക്ളബിന് ജില്ലാഅവാർഡും ഭാരവാഹികൾക്ക് ഏഴ് തവണ യൂത്ത് അവാർഡും ലഭിച്ചിട്ടുണ്ടെന്ന് സത്യചിത്ര പ്രസിഡന്റ് ആർ.അനിൽ, സെക്രട്ടറി വി.ആർ.പ്രകാശ് എന്നിവർ പറഞ്ഞു.