കൊല്ലം: ഓൺലൈനി​ൽ ഓർഡർ ചെയ്ത ഭക്ഷണം വൈകി​യെന്ന പേരി​ൽ ഡെലിവറി ജീവനക്കാരനുനേരെ ജില്ലാ പബ്ലിക് ഹെൽത്ത് ലബോറട്ടറിയിലെ കരാർ ജീവനക്കാരി​യുടെ അതി​ക്രമം. ഓർഡർ ചെയ്ത ചൂടുള്ള ഭക്ഷണം ആളുകൾ നോക്കിനിൽക്കെ യുവാവി​ന്റെ ദേഹത്തേക്ക് വലിച്ചെറിഞ്ഞു. സംഭവത്തിൽ സ്വിഗ്ഗ്വി​യിലെ ഡെലിവറി ജീവനക്കാരനായ കിഴക്കേ കല്ലട തെക്കേമുറി കൽപ്പകവാടി സ്വദേശി സുമോദ് എസ്.ആനന്ദ് (40) കൊല്ലം ഈസ്​റ്റ് പൊലീസ് സ്​റ്റേഷനിൽ പരാതി നൽകി.
ജില്ലാ ആശുപത്രി​ക്ക് സമീപത്തെ പബ്ലിക് ഹെൽത്ത് ലബോറട്ടറിയിൽ പ്രവർത്തിക്കുന്ന കേരള സ്​റ്റേ​റ്റ് എയ്ഡ്‌സ് കൺട്രോൾ സൊസൈ​റ്റിയിലെ ലാബ് ടെക്‌നീഷ്യനാണ് അതിക്രമം കാട്ടിയതെന്ന് സുമോദ് പറഞ്ഞു. രാവിലെ 10.30​ ഓടെയാണ് സംഭവം. പ്രമോദ് പറയുന്നത്: ചില്ലി ചിക്കനും പോറോട്ടയുമാണ് മുൻകൂർ പണമടച്ച് ഓർഡർ ചെയ്തത്. ലഭിച്ച ലോക്കേഷൻ പ്രകാരം പബ്ലിക് ഹെൽത്ത് ലബോറട്ടറിക്ക് സമീപമുള്ള ബ്ലഡ് ബാങ്കിനടുത്താണ് ഭക്ഷണവുമായി എത്തിയത്. ​ഇക്കാര്യം പറഞ്ഞ് വിളിച്ചപ്പോൾ ഭക്ഷണം കൊണ്ടുപോയി കാട്ടിൽ കളയാൻ പറഞ്ഞ് ദേഷ്യപ്പെട്ടു. അ​റ്റൻഡറോട് ഓഫീസ് ചോദിച്ച് മനസിലാക്കി അവിടെ ഭക്ഷണവുമായി ചെന്നെങ്കിലും വാങ്ങാൻ തയ്യാറായില്ല. പണമടച്ചതിനാൽ ഭക്ഷണം സ്വീകരിക്കണമെന്ന് അഭ്യർത്ഥിച്ചു. തുടർന്ന് ഭക്ഷണം അവിടെ വച്ച് പുറത്തേക്ക് ഇറങ്ങുമ്പോൾ
ദേഹത്തേക്ക് എറിയുകയായിരുന്നു. രോ​ഗികളും മ​റ്റും നോക്കിനിൽക്കെയായിരുന്നു ഇത്. നിലത്ത് വീണ് പാക്ക​റ്റ് പൊട്ടി ഭക്ഷണം പുറത്തായി. നല്ല ചൂടുള്ള ഭക്ഷണമായിരുന്നെന്നും ദേഹത്ത് കൊണ്ട് സമയത്താണ് പാക്ക​റ്റ് പൊട്ടിയതെങ്കിൽ പൊള്ളി​യി​രുന്നേനെയെന്നും സുമോദ് പറഞ്ഞു. പബ്ലിക് ലബോറട്ടറി മെഡിക്കൽ ഓഫീസർക്കും പരാതി നൽകിയിട്ടുണ്ട്. കരാർ ജീവനക്കാരിയായ ഇവർ ജോലി സംബന്ധമായ പരാതിയിൽ അന്വേഷണം നേരിടുകയാണ്.