തൃപ്രയാർ: തേവരുടെ കിഴക്കെ നടക്കൽ പൂരം ഇന്ന്. ഉഷ പൂജയ്ക്ക് ശേഷം പുത്തൻകുളത്തിൽ ആറാട്ട്. തിരിച്ച് ക്ഷേത്രത്തിൽ എഴുന്നള്ളും. വൈകിട്ട് നിയമവെടിക്ക് ശേഷം തേവർ സ്വന്തം പള്ളിയോടത്തിൽ പുഴ കടക്കും. അക്കരെയെത്തുന്ന തേവരെ രാമമന്ത്ര ജപങ്ങളോടെ ഭക്തർ വരവേൽക്കും. ആമലത്ത് തറവാട്ടുകാർ ആദ്യം പറ നിറക്കും. തുടർന്ന് തേവർ കിഴക്കേനട പൂരത്തിനെഴുന്നള്ളും. മൂന്ന് ആനകളോടെയുള്ള എഴുന്നള്ളിപ്പിന് വൈക്കം ചന്ദ്രൻ, തൃപ്രയാർ രമേശൻ, ചെറുശ്ശേരി ശ്രീകുമാർ, പനങ്ങാട്ടുകര പുരുഷോത്തമൻ എന്നിവരുടെ നേതൃത്വത്തിൽ പഞ്ചവാദൃം നടക്കും. പൂരത്തിന് ശേഷം തേവർ ഊരായ്മക്കാരായ ചേലൂർ, പുന്നപ്പുള്ളി, ജ്ഞാനപ്പിള്ളി ഇല്ലങ്ങളിലേക്ക് പുറപ്പെടും. പുന്നപ്പുള്ളി മനയിലെ പറയെടുപ്പിന് ശേഷം മുറ്റിച്ചൂർ കൊട്ടാരത്തിൽ പറയെടുക്കും.