തൃപ്രയാർ: മന്ത്രിയുടെ വിദ്യാർത്ഥി വിരുദ്ധ പ്രസ്താവനയ്ക്കെതിരെ വിദ്യാർത്ഥികൾക്ക് രണ്ടുരൂപ നാണയത്തുട്ടുകൾ വിതരണം ചെയ്ത് കെ.എസ്.യു പ്രതിഷേധം. ബസിൽ രണ്ടുരൂപ നൽകിയുള്ള യാത്ര വിദ്യാർത്ഥികൾക്ക് അപമാനമല്ല, അഭിമാനമാണ്. കൺസഷൻ സർക്കാരിന്റെ ഔദാര്യമല്ല, വിദ്യാർത്ഥികൾക്കായി കെ.എസ്.യു നേടിയെടുത്ത അവകാശമാണ്. രണ്ടുരൂപ നൽകിയും യാത്ര ചെയ്യാൻ സാധിക്കാത്തവരുണ്ടെന്ന് ഗതാഗത മന്ത്രി മറക്കരുതെന്നും യൂത്ത് കോൺഗ്രസ് സംസ്ഥാന ജനറൽ സെക്രട്ടറി ശോഭാസുബിൻ പ്രതിഷേധം ഉദ്ഘാടനം ചെയ്തുകൊണ്ട് പറഞ്ഞു.

രണ്ടുരൂപ നാണയം വിദ്യാർത്ഥികൾക്ക് വിതരണം ചെയ്തായിരുന്നു കെ.എസ്.യു നാട്ടിക നിയോജക മണ്ഡലം കമ്മിറ്റിയുടെ പ്രതിഷേധം. കെ.എസ്.യു നാട്ടിക നിയോജക മണ്ഡലം പ്രസിഡന്റ് സച്ചിൻ ടി. പ്രദീപ് അദ്ധ്യക്ഷനായി. യൂത്ത് കോൺഗ്രസ് ജില്ലാ സെക്രട്ടറി അശ്വിൻ ആലപ്പുഴ കെ.എസ്.യു ജില്ലാ ജനറൽ സെക്രട്ടറിമാരായ വൈശാഖ് വേണുഗോപാൽ, യദു കൃഷ്ണൻ അന്തിക്കാട് എന്നിവർ സംസാരിച്ചു.

കെ.എസ്.യു നേതാക്കളായ ജിതിൻ ചാക്കോ, ഡിജിൻ ഡേവീസ്, റിജോ, ആഷിക് താന്ന്യം, പ്രണവ്, രാഹുൽ കെ. ജയൻ, റൈസൽ എനിവർ നേതൃത്വം നൽകി.