നാഗർകോവിൽ: കന്യാകുമാരി ജില്ലയിലെ പ്രസിദ്ധമായ സാമിതോപ്പ് അയ്യാ വൈകുണ്ഠ സ്വാമി ക്ഷേത്രത്തിൽ കുംഭമാസ ഉത്സവവും സ്വാമിയുടെ അവതാര ദിനവുമായി ആഘോഷിച്ചു. കഴിഞ്ഞദിവസം രാവിലെ 6ന് തിരിച്ചെന്തൂർ, ഉടൻക്കുടി, ആരൽവാമൊഴി വഴി വാഹന ഘോഷയാത്ര നാഗർകോവിൽ നാഗരാജ ക്ഷേത്ര മൈതാനത്ത് എത്തിച്ചേർന്നു. അന്ന് രാവിലെ 9ന് തിരുവനന്തപുരം പത്മനാഭസ്വാമി ക്ഷേത്രത്തിലെ വടക്ക് നിന്നാരംഭിച്ച ഘോഷയാത്ര മാർത്താണ്ഡം വഴി രാത്രി നാഗർകോവിൽ നാഗരാജ ക്ഷേത്ര മൈതാനത്തിലെത്തി ചേരുകയും ചെയ്തു.

തുടർന്ന് ഇന്നലെ രാവിലെ 5ന് നാഗരാജാക്ഷേത്ര മൈതാനത്തിൽ നിന്ന് കുംഭമാസ ഘോഷയാത്ര സ്വാമി തോപ്പ് വൈകുണ്ഠസ്വാമി ക്ഷേത്രത്തിലേക്ക് പുറപ്പെട്ടു. ഘോഷയാത്രയ്ക്ക് ബാല പ്രചാതിപതി അടികൾ നേതൃത്വം വഹിച്ചു. കോട്ടാർ,ശുചീന്ദ്രം, ഈത്തൻക്കാട് വഴി ഉച്ചയ്ക്ക് സ്വാമി തോപ്പിൽ എത്തിചേർന്ന ഘോഷയാത്രയിൽ ആയിരങ്ങൾ പങ്കെടുത്തു. അയ്യാ വൈകുണ്ഠസ്വാമി അവതാര ദിനത്തോടനുബന്ധിച്ച് ഇന്നലെ കന്യാകുമാരി ജില്ലയിലെ മാർത്താണ്ഡത്തിൽ നിന്ന് സ്വാമിതോപ്പിലേക്ക് സ്പെഷ്യൽ ബസുകളും ഉണ്ടായിരുന്നു. ജില്ലാ പൊലീസ് മേധാവി ബദ്രി നാരായണന്റെ നേതൃത്വത്തിൽ കനത്ത പൊലീസ് സുരക്ഷ ഒരുക്കിയിരുന്നു.