തിരുവനന്തപുരം: വനിതാ ദിനത്തോടനുബന്ധിച്ച് വനിതാ ശിശുവികസന വകുപ്പ് രാത്രി നടത്തം സംഘടിപ്പിച്ചു. പൊതുയിടങ്ങൾ സ്ത്രീകളുടേതും കൂടിയെന്ന് ഓർമ്മിപ്പിക്കുന്നതിനുവേണ്ടിയാണ് രാത്രി 10ന് കനകക്കുന്ന് മുതൽ കിഴക്കേക്കോട്ട ഗാന്ധിപ്പാർക്ക് വരെ പരിപാടി സംഘടിപ്പിച്ചത്. ഇതോടൊപ്പം നൈറ്റ് ഷോപ്പിംഗും ഉണ്ടായിരുന്നു.

മന്ത്രി വീണാ ജോർജ് രാത്രി നടത്തത്തിന് നേതൃത്വം നൽകി.

പൊതുയിടങ്ങൾ സ്ത്രീകൾക്കും കൂടി അവകാശപ്പെട്ടതാണെന്നും സ്ത്രീകൾക്ക് രാത്രിയിൽ സഞ്ചരിക്കാൻ പറ്റാത്ത അവസ്ഥ മാറണമെന്നും മന്ത്രി പറഞ്ഞു. വനിതാ ശിശുവികസന ഡയറക്‌ടർ ടി.വി. അനുപമ, കളക്‌ടർ ഡോ. നവജ്യോത് ഖോസ, ലക്ഷ്‌മി നായർ, സിനി ആർട്ടിസ്റ്റുകളായ ഇന്ദുലേഖ, അഞ്ജിത, രാഖി രവീന്ദ്രൻ, മീര അനിൽ, മേഘ്‌ന വിൻസെന്റ്, കവി മുരുകൻ കാട്ടാക്കട തുടങ്ങിയവരും പങ്കെടുത്തു. 11ന് ഗാന്ധിപ്പാർക്കിൽ നടന്ന സമ്മേളനത്തോടെ രാത്രി നടത്തം അവസാനിച്ചു.