തിരുവനന്തപുരം: ഏപ്രിൽ 7 മുതൽ 13 വരെ നടക്കുന്ന കരിക്കകം ശ്രീചാമുണ്ഡി ക്ഷേത്ര ഉത്സവത്തിന് മുന്നോടിയായി വിവിധ വകുപ്പുകളുടെ അവലോകന യോഗം ചേർന്നു. വകുപ്പുകളും സ്ഥാപനങ്ങളും നടത്തേണ്ട മുന്നൊരുക്കങ്ങൾ സമയബന്ധിതമായി പൂർത്തിയാക്കണമെന്ന് യോഗത്തിൽ അദ്ധ്യക്ഷത വഹിച്ച കടകംപള്ളി സുരേന്ദ്രൻ എം.എൽ.എ നിർദേശിച്ചു. കൊവിഡ് പ്രോട്ടോക്കോൾ പൂർണമായും പാലിച്ചായിരിക്കും പൊങ്കാല മഹോത്സവം. ഉത്സവ നടത്തിപ്പിന് സർക്കാരിന്റെ പൂർണ പിന്തുണയുണ്ടാകുമെന്നും ഒരിക്കൽ കൂടി അവലോകന യോഗം ചേരുമെന്നും അദ്ദേഹം അറിയിച്ചു. ഡെപ്യൂട്ടി മേയർ, കരിക്കകം വാർഡ് കൗൺസിലർ, ജില്ലാ മെഡിക്കൽ ഓഫീസർ, ശംഖുംമുഖം അസിസ്റ്റന്റ് കമ്മിഷണർ, വിവിധ വകുപ്പുകളിലെ ഉന്നതോദ്യോഗസ്ഥർ, ക്ഷേത്ര ട്രസ്റ്റ് ഭാരവാഹികൾ തുടങ്ങിയവർ പങ്കെടുത്തു.
യോഗത്തിലെ തീരുമാനങ്ങൾ
ക്ഷേത്രത്തിലേക്കുള്ള നഗരസഭയുടെയും പി.ഡബ്ല്യു.ഡിയുടെയും റോഡുകളുടെ ടാറിംഗും അറ്റകുറ്റപ്പണികളും ഉടൻ പൂർത്തിയാക്കും
അന്നദാനത്തിന് ഉൾപ്പെടെ ഉത്സവത്തിന് ആവശ്യമായ വെള്ളം വാട്ടർ അതോറിട്ടി ലഭ്യമാക്കും. നിശ്ചയിച്ച സ്ഥലങ്ങളിൽ ടാങ്ക് സ്ഥാപിച്ച് ജലവിതരണം നടത്തും
ക്ഷേത്ര പരിസരത്തുള്ള ജപ്പാൻ കുടിവെള്ള പദ്ധതിയിൽ നിന്ന് 50 പൈപ്പ് കണക്ഷനുകൾ അധികമായി സ്ഥാപിക്കും
പൊങ്കാലയ്‌ക്ക് വേണ്ടി ശുദ്ധജലം ശേഖരിക്കാൻ ആവശ്യമായ ടാങ്കുകളും മറ്റും താലൂക്കും നഗരസഭയും ലഭ്യമാക്കും
പുറത്തെഴുന്നള്ളത്ത് നടക്കുന്ന ഏപ്രിൽ 12നും പൊങ്കാല ദിവസമായ 13നും സായുധ പൊലീസിനെയും കൂടുതൽ വനിതാ പൊലീസിനെയും നിയോഗിക്കും
ക്ഷേത്രത്തിൽ പൊലീസ് കൺട്രോൾ റൂമും സി.സി ടിവി കാമറകളും എയ്ഡ് പോസ്റ്റുകളും സ്ഥാപിക്കും. ട്രാഫിക് പൊലീസിന്റെ സേവനം ലഭ്യമാക്കും
പൊങ്കാലയ്‌ക്ക് മൂന്ന് അസിസ്റ്റന്റ് കമ്മിഷണർമാർക്ക് കീഴിലായി 300 പൊലീസുകാരെ വിന്യസിക്കും
ഉത്സവത്തോടനുബന്ധിച്ചുള്ള പരിപാടികൾക്ക് പൊലീസിന്റെ മുൻകൂർ അനുമതി വാങ്ങണം
ശുചീകരണം നടത്തുകയും മെഡിക്കൽ ടീമിന്റെയും 108 ആംബുലൻസുകളുടെയും സേവനവും ഉറപ്പ് വരുത്തും
കടകംപള്ളിയിലെ മെഡിക്കൽ ഓഫീസർ പ്രവർത്തനങ്ങൾ ഏകോപിപ്പിക്കും
പൊങ്കാല ദിവസം ഫയർഫോഴ്‌സ് സേവനവും ലഭ്യമാക്കും
ഏപ്രിൽ 12, 13 തീയതികളിൽ എല്ലാ പാസഞ്ചർ ട്രെയിനുകളും കൊച്ചുവേളി റെയിൽവേ സ്റ്റേഷനിൽ നിറുത്തുന്നതിന് റെയിൽവേയ്ക്ക് കത്ത് നൽകും
കെ.എസ്.ആർ.ടി.സിയുടെ സ്റ്റേഷൻ മാസ്റ്റർ ഓഫീസ് ക്ഷേത്രപരിസരത്ത് സ്ഥാപിക്കും
ഉത്സവ ദിവസങ്ങളിൽ ജില്ലയിൽ നിന്നും സമീപ ജില്ലകളിലെ എല്ലാ ഡിപ്പോകളിൽ നിന്നും കൂടുതൽ സർവീസുകൾ നടത്തുന്നതിനുള്ള നടപടികൾ സ്വീകരിക്കും.
കെ.എസ്.ഇ.ബിയുടെ എയ്ഡ്‌പോസ്റ്റ് ക്ഷേത്രപരിസരത്ത് സ്ഥാപിക്കും
ഉത്സവ മേഖലയിൽ സ്ട്രീറ്റ് ലൈറ്റുകൾ സ്ഥാപിക്കാനും രഥം കടന്നുപോകുന്ന വീഥികളിലെ വൈദ്യുതി കമ്പികൾ ഉയർത്താനും നടപടി സ്വീകരിക്കും
നാദവും ദീപാലങ്കാരങ്ങളും പ്രവർത്തിപ്പിക്കുന്നതിന് ക്ഷേത്രപരിസരത്ത് താത്കാലിക കണക്ഷൻ അനുവദിക്കും
ഉത്സവ ദിവസങ്ങളിലും പൊങ്കാല ദിവസവും ക്ഷേത്ര പരിസരം ശുചീകരിക്കാൻ താത്കാലിക ജീവനക്കാരെ നിയോഗിക്കും
പൊങ്കാലയ്ക്കുള്ള ശുദ്ധജലത്തിനായി കോർപ്പറേഷനിൽ നിന്ന് വാട്ടർ ടാങ്കുകൾ അനുവദിക്കും
പൊങ്കാല ദിവസം ക്ഷേത്രപരിസരത്ത് മൊബൈൽ ടോയ്‌ലെറ്റ് സ്ഥാപിക്കും
ഉത്സവത്തിന് മുൻപ് ലിഫ്റ്റ് ബ്രിഡ്ജ് സജ്ജമാക്കും, ആവശ്യമെങ്കിൽ താത്കാലിക പാലം നിർമ്മിക്കും
സപ്ലെകോയുടെ മൊബൈൽ വാഹന സർവീസ് ലഭ്യമാക്കും
ഭക്ഷ്യസുരക്ഷാ വകുപ്പിന്റെയും നഗരസഭാ ആരോഗ്യ വിഭാഗത്തിന്റെയും കർശന പരിശോധന ഉണ്ടാകും
അന്നദാനവും കുടിവെള്ള വിതരണവും നടത്തുന്ന സന്നദ്ധ സംഘടനകൾ ഫുഡ് സേഫ്ടി ഓഫീസറുടെ അനുമതി വാങ്ങണം
ഗ്രീൻ പ്രോട്ടോക്കോൾ കർശനമായി പാലിക്കണം
ക്ഷേത്ര പരിസരത്ത് കൊടികൾ അനുവദിക്കില്ല